عواميد الأهرامات

يقال إنه تم إكتشاف عواميد بطول 2 كيلومتر للعامود الواحد تحت الأهرامات وفي اللي عدل وقال لأ دول 800 متر أو اقل، أيًا كان، لو الخبر ده صح فهي صفعة جديدة على وش العالم كله بعصريته وتكنولوجيته وتقدمه، أنا مش واثقة من صحة الخبر ده بس خلينا كده نشوف التعليقات اللي يقال إنها اتقالت عن الإكتشاف وهو إن مستحيل بتكنولوجيا عصر القدماء المصريين، من آلاف السنين، إنهم يقدروا ينفذوا مباني أو "أوتاد" بالعظمة دي تحت الأرض وده طبعًا هيودينا لسكة العماليق والفضائيين والجن والمايتي بني آدمين. مفيش شك إن القدماء المصريين لجأوا للسحر ونبغوا فيه وكان جزء مهم من الحضارة والدليل على ده إن ربنا سبحانه وتعالى لما بعث سيدنا موسى للفرعون الظالم بعثه بمعجزات تنافس سحر المصريين، لكن ومع عدم علمي بشئون السحر واللجوء للجن، أظن إن السحر مؤقت، يأما بوقت معين أو لغرض، يعني مثلًا لو هنقول في سحر اتعمل لمقابر الملوك والنبلاء عشان ميتمش العبث بكنوزها وأمواتها، فده مرهون بإن الحماية تتحقق، لو جت الدولة أو أشخاص عاديين أو مجموعة من اللصوص وقدروا يفتحوها وياخدوا اللي جواها، يبقى خلاص دور الجن خلص، مبقاش في سحر (على اعتبار إن في حاجة اسمها لعنة الفراعنة)، ومظنش بنفس المنطق إن هيبقى في بناء يفضل لآلاف السنين معمول بسحر وخداع عيون الناس، على الأقل لو بنتكلم على بناء بشري في أرض بشرية غرضه يتعرض على حضارات بشرية، ملخص الموضوع إن المصريين عباقرة، بسحر من غير سحر عباقرة، والأهرامات بتاعتنا والمسلات بتاعتنا والقصور والمدن والحضارة كلها، واللي مخلي أصحاب الحضارات المعاصرة يعملوا نظريات ويحاولوا يفسروا أسباب العبقرية والصنعة بأفكار بره الصندوق، بره الصناديق كلها، هو عجزهم إنهم يفهموها ومقارنتهم ما بين التكنولوجيا بتاعتهم وتكنولوجيا قدماء المصريين، هم ببساطة مش قادرين يوصلوا للتكنولوجيا دي، وسبب إن المصريين مشاركوش الknow how أو الأسرار الفنية للتكنولوجيا بتاعتهم هو إنهم مكنوش عايزين! هم بس حبوا يشاركوا النتايج مش التفاصيل والصنعة، تخيلوا معايا كده إنهم نشروا طريقة البناء وتفاصيل العلوم التانية ووقعت التكنولوجيا دي في إيد الناس الغلط، زي خدام الشيطان، أم@ريكا وإسر#ائيل كانوا هيعملوا بيها إيه؟؟ إيه الدمار اللي هيسببوه للعالم، شوفوا من غير التكنولوجيا دي عاملين إيه!!

وأنا برغم جهلي بالأسرار الفنية لحضارة القدماء لكن عندي تفسير لجت منين، بالنسبة للشخص المؤمن محتاج عنصرين عشان يعمل شيء مميز في حياته: اليقين بالله والروقان. الله أعلم بالقدماء المصريين، يمكن كان في عصور فيها توحيد وعصور فيها وثنية، وكان فيه المؤمن والكافر والمشرك لكن الأكيد إنهم كانوا رايقين!

الروقان يعني إن الواحد يبقى متفرغ للإبداع والإبتكار من غير ضغوط نفسية وعصبية، الضغوط اللي بتيجي من ميزانية محددة، أو من فساد مسؤولين أو من مطامع في التوسع وتخريب دول تانية أو من بيروقراطية ومنهج معين مفروض، أي إبداع هتشوفه لازم يكون الفنان فيه كان عنده مساحة وحرية إنه يبدع، واخد كارت بلانش، سواء في الهندسة أو في الطب أو الفنون أوالموسيقى، يجرب الأشكال الهندسية والمقاييس لحد ما يوصل للشكل النهائي، يستكشف أعشاب وسموم ويدرس المخلوقات لحد ما يوصل للدوا والمصل وسر التحنيط، في ظل راحة نفسية ومجتمع مفيهوش ضغوط اقتصادية ولا فساد ولا خوف من إن حد ياخد مجهودك أو يستهون بيه ويرميه في الدرج ويقفل عليه أو التعرض للقتل بسبب اكتشافك، دي حضارة عمرها آلاف السنين، يعني الواحد كان ممكن يوصل لفكرة، بذرة صغيرة يكملها اللي بعده واللي بعده لحد ما يوصلوا لشيء عظيم، الملخص الأهرامات بتاعتنا والتماثيل بتاعتنا والجمال والفن بتاعنا ودي حضارتنا مش حضارة فضائيين ولا أفرو سينتريك ولا أطلانطس واللي عنده معزة يربطها....