عن الرمز الضائع لدان براون

"الرمز الضائع" “The Lost Symbol” هي الرواية التالتة لدان براون واللي حققت نجاح ومبيعات رهيبة وبتحكي عن مغامرة جديدة لروبرت لانجدون المتخصص في الرموز وترجمتها. المغامرة المرة دي مع واحد من أصدقائه المقربين اللي هو "بيتر سولومن" وأخته "كاثرين". "بيتر" رجل أعمال ثري جدًا وف نفس الوقت عضو ماس.وني و"كاثرين" عالمة في الوعي الإدراكي وهو مجال جديد نسبيًا وغريب على العالم ببساطة بيبحث قوة العقل الإنساني وقدراته اللي بتتعدى القدرات المستخدمة في الواقع الحسي واليومي المعتاد. "بيتر" بيتخطف في بداية الرواية وروبرت وكاثرين بيسعوا يوصلوله ويحاولوا أنهم يتفاوضوا مع الخاطف وفي خلال المغامرة المثيرة بنكتشف أسرار كتير للماس.ونية من ضمنها هرم صغير بيتضح أنه خريطة فيها ألغاز ورموز بتشير في النهاية "لو إترجمت بشكل صحيح" لموقع فيه الرمز الضائع واللي المفروض سر عظيم هيعمل فرق كبير على مستوى الإنسانية كلها....

اسلوب "دان براون" لا غبار عليه طبعًا من حيث السلاسة وسهولة اللغة، مش بيستخدم مصطلحات معقدة لأنه بيعتمد على مدرسة "كفاية الفكرة العبقرية التقيلة وتسهيل المفردات" ودي من وجهة نظري أفضل مدرسة للكتابة لو الكاتب هيختار قصص وأفكار مش إعتيادية وعميقة لأن القارىء هيُجهد عشان يفهم القصة نفسها فمفيش داعي أبدًا لتعقيد المصطلحات وزيادة إجهاده في فهمها ده غير أن "دان براون" جمع ما بين أنه روائي ممتاز وسيناريست درجة أولى من حيث الحبكة والحوار ومخرج فوق الممتاز من حيث تحريك الأشخاص وتصوير المشاهد وتقفيلها والإنتقال من مشهد للتاني، هو قدر يكون مخرج على الورقة وخلى اللي قرا الرواية قادر يشوف المشاهد مجسمة قدامه. نيجي بقى للغلطة الكبيرة اللي وقع فيها دان براون، عشان أكون صريحة وواضحة مع القارىء "مفيش كاتب محايد!" كل الكتاب بمعنى كل الكتاب ليهم آراء ومنحازين لجهات لأنهم في النهاية "بشر" مفيش حاجة إسمها كاتب موضوعي ، إنما شطارة الكاتب ومهارته في أنه ميبينش الإنحياز ده، أنه يعرض حكايته أو روايته بشكل سلس ويقدر ببراعة يقنع القارىء بوجهة نظره والرأي اللي منحاز ليه من غير ما يبيبن الرأي بطريقة فجه ومباشرة أما "براون" فف.شل ف ده ف.شل ذريع لأنه من خلال سطور الكتاب وضح إنحيازه الرهيب للماس.ونية وعرضهم على أنهم "ملايكة" و"حاملين شعلة الخلاص والنور والهداية للإنسانية كلها" وأنا هنا مش بصدد مناقشة الماس.ونية وإذا كانوا كويسين أو وحشين أنا بنتقد عدم المهنية في عرض وجهة النظر والإنحياز الكبير، اللي يقرا الرواية بتمعن هيستنتج أنها ممكن تكون إتكتبت في الأساس عشان الغرض ده بس! تقريبًا مفيش صفحة بتعدي من ال660 إلا وذكر فيها محاسن الماس.ونيين وروحانيتهم ورقي رسالتهم والأكتر سموهم على كل البشر لأنهم بيحملوا أسرار الخلاص وسر الحضارات "بما فيها الفرعونية" وجوهر الحكمة. الغلط التاني هو سرد لتجربة قامت بيها "كاثرين" عشان تثبت وجود الروح، التجربة دي كانت بوزن شخص قبل الموت وبعده مباشرة عن طريق جهاز دقيق جدًا وفعلًا الجهاز قاس فرق في الوزن طفيف "قبل الموت الجسم كان أتقل" وأخوها "بيتر" كان منبهر جدًا لدرجة أنه اتأثر ودمع لأن ده أداله أمل أنه هيقدر يتجمع مع أحبائه الراحلين في حياة تانية بعد الموت. اللي مش قادرة أفهمه إزاي "براون" مذكرش في وسط الأحداث أن التجربة دي إتعملت على أرض الواقع في بداية القرن العشرين! واللي قام بيها العالم "ماكدوجال" وإتوصل أن وزن الروح بالظبط "21 جرام" وبعدين تبين أن نقص الوزن بسبب تبخر سوايل الجسم عن طريق التعرق والهوا اللي كان موجود في الرئة قبل الموت وقل بعدها ودي في رأيي سقطة ، كان لازم يذكر أن "كاثرين" مش أول واحدة تقوم بالتجربة دي وأن العلم أثبت أنها تجربة مش ناجحة ومش هي اللي تثبت وجود الروح والحقيقة مش عارفه ليه السقطة دي حصلت، هل لأنه إعتمد على أن القارىء جاهل مثلًا مش ممكن يكون قرا عن تجربة زي دي، إستخفاف بيه وبثقافته؟

الكتاب في المجمل حلو جدًا، أسلوبه وحبكته وبناء المشاهد بس وأنت بتقرا اقرا ما بين السطور والأسلوب، إوعى "دان براون" يغشك :D