"عن القمر والطين" لصلاح جاهين

الكتاب مجموعة متنوعة من الأشعار ما بين الغزل والشعر الوطني والقصايد اللي بتتكلم عن العروبة والقومية العربية. الحقيقة جاهين حقق حاجة صعبة أوي هي البساطة الشديدة اللي صعب جدًا حد يقدر يقلدها! "السهل الممتنع الجميل البسيط اللي يلمس المشاعر" ده تلخيص لأسلوب جاهين العبقري..جاهين من أكتر الشعرا والفنانين الحساسين وقدر يعبر عن الحساسية دي والأحاسيس ، ودي مهمة صعبة جدًا وهو أداها بنجاح ساحق وحرفنة..متقدرش تتجاهل الإحساس اللي بيتسلل ليك وانت بتقرا أشعاره وهو الكآبة الشديدة والحزن اللي بيخرج من جوف الحروف برغم الإيجابية والرومانسية اللي بيحاول يوصلها، تقريبًا كلمات "جاهين" كانت هي "جاهين"، مراية عكست اللي جوه نفسه ما بين التمني لمستقبل أحسن ولقا حبيب ليه يداوي شوقه والجروح فيه بس حزن غريب يوصل أنه يوجع اللي يقرا بجد ويتأمل الكلمات وأظن ده لظروف وتفاصيل ف حياته الشخصية مش كلها بل أغلبها مش معروف زائد حساسيته المفرطة تجاه كل الأحداث حواليه زي ظروف بلده ، بقايا الإحتلال والحروب اللي خضناها والجهاد في الجزاير متمثل ف "جميلة بوحريد" اللي كان لازم يكتب عنها برده وينقل عذابها وكفاحها ده غير لبنان وفلسطين وغيرهم...الجميل ف أشعاره الوطنيه الروح الإيجابية والعشم، جاهين كان صادق جدًا ف إحساسه مش منافق، كان متحمس جدًا لعهد ما بعد ثورة 1952 وشايف أن البلد هتقوم صناعيًا واقتصاديًا وده بنشوفه في قصايد الغزل عن "الآلات والمصانع" وكمان الفلاح والأرض بتاعته...أرشح بقوة تقرأوا "عن القمر والطين" وتقرأوا لجاهين عمومًا ، إحساسه فوق الوصف، جميل بإختصار شديد جميل.....