أكبر غلط ممكن حد يقع فيه هو أنه يعيش حياته بييجي على نفسه عشان إرضاء غيره وده لسعيه أنه يكسب حب الناس، اه مطلوب مننا نكون ذوق ومش أنانيين ونقبل بالحلول الوسط ونبقى بسطاء والتعامل معنا سلس لكن دي حاجة مختلفة تماما على انك تيجي على نفسك عشان ترضي غيرك، توافق بظروف مش راضي عنها، تخرج في أماكن مش بتحبها، تختار اكل مش عايزه أو هيضرك، توافق على مواعيد بالنسبة لك مزعجة وهكذا، ليه بقى؟ عشان في الآخر برضه وسبحان الله هتخسر اغلب الناس اللي كنت بتسعى ترضيهم، لأنك مثلاً ممكن تلاقي نفسك ودون تحكم بتتمرد على شخصيتك القديمة وبتخلعها وبتبدل جلدك زي التعبان كده وبتتفجر لأنك مش مستوعب كل اللي بيحصل جوه نفسك، تركيبتك كإنسان معقدة جداً ، جواك عالم كامل وقد يكون في بوادر ثورة بتحصل فيك أنت مش مدركها، جواك مش راضي عن اسلوب حياتك وبيحيك مؤامرة ضد كل الضغط اللي كنت عايشه وأنت فاكر أنك تمام ، بتلاقي نفسك فجأة مش بتتنازل زي الأول ، مش عايز تروح المكان ده ولا تاكل الأكلة دي ولا تتعرض للاستغلال والمصالح والمشاوير الصعبة اللي كانت مرسومة ليك أنت بس ولا عايز تتأخر في المواعيد ولا نافع معاك إن حد يقول لك تعلالي دلوقتي أنا والباقي متجمعين ومستنيينك، لأ أنا عايز تحترموني كفاية وتبلغوني قبلها بيوم ، لإني عندي التزامات وحياة أو مزاجي كده، من غير ليه، لازم تحترمني، والدايرة اللي حواليك مش متعودين منك على ده فبيقرروا guess what ، يسيبوك برغم إن في شخصيات أصعب بكتير بيتعاملوا معاهم وأنت يدوبك طلبت الإحترام والأصول والمساحة الشخصية وفي الآخر خسرت أغلب الناس وانت طول عمرك كنت بتسعى ترضيهم وتيجي على نفسك عشانهم.
الخلاصة خليك على طبيعتك وعبر عن نفسك وعن اللي انت عايزه وبتفكر فيه ومتتنازلش في حقوقك وخليك صادق لإن ربنا لو رايد ليك تكسب محبة الناس هتكسبها ولو رايد علاقتك متستمرش مع حد مش هتستمر مهما أنت عملت. لا تكن people pleaser
2
-2
