إستعد "جعيدي" و"مهيطل" للدخول لهذا الهايبر ماركت الخطير اللي بيشفط الجماهير غير أن شيء ما إستوقفهما.. رجل ظهر على بعد خطوات من مدخل"غزو الهكسوس هايبر ماركت" يرتدي البرنيطة والبالطو ويمسك بين صوابعينه سيجارة وينفث الدخان ويصنع منه دوائر وفيونكات، أنه...أنه "سعفان مدخنة"! أن أن أااااان.
-أنااا....
-أنت ايه؟ مش كفاية عليك تجرحني حرام عليك.
-إستني بس يا "مهيطل" نفهم إيه اللي جاب الشرير ده هنا، أنت بتراقبنا يا عميل "مدخنة"؟
-أنا كنت معدي شفت الكشك الصغير ده قلت أهدي... مخزون علب السجاير عندي قرب يخلص مفضلش غير تريليون و3 علب بس.
-يا سلام عايزنا نقتنع بالحدوته دي؟
-في إيه يا عميل "مهيطل" طول عمرك حاططني في دماغك وزاعق ليه، أنا ممكن أكون الشخصية الشريرة في المسلسل ده بس دماغي والعة ومشعشة، طب أقولك على فكرة، دلوقتي إحنا 100 مليون لو جبنا بوكس صغير شيك كده ونلفه بورق هدايا وجليتر وخلينا كل مواطن يحط فيه جنيه واحد وعملنا قرعة وإخترنا مواطن ياخد ال100 مليون أول واحد وكل يوم نعمل بوكس و قرعة جديدة واللي ييجي عليه الإختيار يقبض 100 مليون وهكذا، تقولي طيب والأخير اللي هيقبض بعد 100 مليون يوم ؟ أقولك ده يبقى أكتر واحد محظوظ لأنه هيقدر يجيب مدفأة حرارية ضخمة حيث أننا هنكون دخلنا عالعصر الجليدي أو يعمل سترة من طبقات كتير يستر بيها نفسه وبالباقي يعمل صنارة عشان لما يصطاد وهو قاعد على التلج من الفتحه في المحيط المتجمد.
-أنت بتقول ايه؟
-طب أنا بقى هستأذن واضح أنكم ف مهمة سرية أوي، سي يو ليتر وتذكروا الشر لا ينتهي ، سعفان هاز نو إند.
**************
دلف "مهيطل" ومن وراءه "جعيدي" إلى مدخل "غزو الهكسوس". إلتفت "جعيدي" بحركة رشيقة سريعة وعمل مسح للمكان بيعونه الصقر الدباحة ثم همس ل"مهيطل":
-أنا متوجس خيفة ومش مرتاح أنا قلبي طيارة ورق وشعر دراعي عرق.
-قلقان من إيه؟ شوف ده حتى البنت اللي عالكاشير أم المريله كحلي يا شمس هله وطاله من كوله كيوت ... تعالى تعالى مفيش حاجة تستعدي الخوف.
-مفيش حاجة تستدعي الخوف ايه، مش أنت اللي بتقول في طائفة وطقوس وقدرات خارقة؟
-طب وفيها إيه، في الملفات السرية دي حاجة روتينية نخلص ونطلع ناكل مهلبية.
توجه "مهيطل" بتحمس إلى الفتاة الجالسة على الكاشير وقد بدت الأجواء هادئة بشكل مريب وقرر أن يستجوبها ويدحلبها في الكلام.
-مساء الخير القصة اللي باينه من الطرحة دي طبيعي ولا كوافير؟
-مكوة شعر.
-أحسن ناس.
-خير يا عالي الإحساس؟
وضع مرفقه على الطاولة أمامها ووقف بدلال وإغراء ورمقها بنظرة عملاء غامضة خطيرة ثم أكمل:
-إيه الكلام، إيه اللي بيحصل في السوبر ماركت يا مدام؟
-مقدرش أقول.
-متخفيش قولي متخفيش ميهمكيش.
ثم لاحظ "مهيطل" فجأة أن الكاشير فاضي ومهوي ولا يوجد عليه إقبال فإستوحش الوضع وشعر بالإندهاش والغربة.
-أمال فين الزباين، الدنيا فاضية أوي كده ليه؟
اشارت له بإصبعها وهي ترفع نظرها فوقعت عيناه مع "جعيدي" على لافتة أعلى الكاشير مكتوب عليها "أقل من 10 مفردات".
سارع "جعيدي" قائلًا:
-يعني هو معقول مفيش حد معاه أقل من 10 مفردات؟
رمقتهما آنسة الكاشير بنظرة خبيثة شريرة وردت:
-مفيش.
-مش فاهم.
ردت بخبث أكبر من سابقه:
-هتفهم..هتفهم.
إلتفت "مهيطل" ولف ذراعه ليضعه على كتف "جعيدي" ومشيا بضعة خطوات والحيرة تملؤهما. فجأة رفع "جعيدي" نظره إلى "مهيطل" وسأل وعيناه حيرانه:
-عميل "تعلب" أنا مكنتش أعرف إنك بتعرف تعاكس.
- انا مكنتش بعرف أعاكس زمان لحد ما شفت جفنه فعلمني الغزل.
-جفن مين؟
-غزال الريم خلال إحدى الملفات السرية أوي ف منغوليا.
-مفهوم، مف...
لم يكمل العميل "جماجم" جملته وقد إستشعر "مهيطل" أن هناك شيئًا على غير ما يرام فلم يعد يشعر بوجود "جعيدي جماجم" حيث إمتلك "مهيطل" حسًا مخابراتيًا ممتازًا وقد تأكد لديه الإحساس عندما سمع "جعيدي" يصرخ:
-مهيطاااااااااااااال.
التفت "مهيطل" في حركة سريعة وقد إعتلى وجهه الفزع فلمح وجه "جعيدي" مذعورًا وسط زحام مرعب قبل أن يبلعه الزحام ويختفي تمامًا عن النظر. وضع العميل "تعلب" صوباعه على طبنجته داخل استك السلاح على خصره لتطير في الهواء بشكل لولبي وتستقر في يده ثم أخذ يصرخ:
-عميل جعيدي جماجم، أجماااااااااجااااام.
ثم تحرك سريعًا يركض في حركة zigzag لكن التصوير كان بطيئًا لزيادة الإثارة والمتعة.
وما لبث أن وجد حاله مفعوصًا وسط أعداد غفيرة من البشر وعربات التسوق التي حملت أكياس اللحم والفراخ والمعكرونة والأرز والملح والحساء والصلصة والكاتشب والبهارات والشيبسي والمولتو والبيبسي والياميش والزبيب والقطايف... ثانية واحدة كده، إحنا النهارده كام في الشهر؟
يا للهول، أدرك العميل "تعلب" للتو أن هذا اليوم كان الموافق للثامن والعشرين من شعبان أي أن اليوم التالي يوافق الوقفة وبعدها.. بعدها رمضان، إنه غزو المشتريات وهجر الجيم والآلات.
"يتبع"
"تو بي كونتينيود"
2
-2
