قضى "مهيطل" و"جعيدي" الليلة في مراقبة مبنى السجل المدنى بينما تسليا ب 5 كيلو دونتس بالعسل والشيكولاته والفراولة المنتهية الصلاحية ولم يلمحا أي حركة مريبة بالقرب من المبنى ما عدا ذلك الرجل الذي ثبت خمسة أسر في أوقات مختلفة ونشل كل ما حملوه من نقود وموبايلات وأحزمة وتوك شعر وأساتك وحقائب ومحافظ نقود وساعات يد إلا أنهما لم يتحركا حيث لم يرغبا أن يضيعا طاقتيهما على أمور تافهة لا تودي ولا تجيب وينشغلا عن القضية الأساسية وهي ما يدور داخل ذلك المبنى المريب.
ثم غلبهما النعاس وتمدد جعيدي في المقعدين الأماميين بينما تمدد "مهيطل" في المقعد الخلفي الفسيح المريح...
إستيقظ "جعيدي" على طرقات على الزجاج ففتح عينيه ليجد العميل "008" يضرب الزجاج بمفصل إصبعه.
فتح الزجاج ببطء وهو يجاهد ليفتح عينيه عن آخرهما:
-عميل "008" انت مش كان دورك خلص؟
-ده حقيقي بس سُنة الدراما والأفلام والمسلسلات لما بيلاقوا شخصية بتسمع لدى الجمهور والناس وبتنجح بيرجعوها تاني حتى لو الشخصية دي إتخبطت بعربية ووقعت من الأسانسير للمنور وإتضربت بالرصاص ف الراس أو وقعت ف وسط زلزال وبقت للناس مداس. يلابقى نصحي العميل "مهيطل".
-لأ سيبلي أنا الطلعة دي.
أخرج "جعيدي" من جيب جاكتته مسدسه وأطلق رصاصتين في الهواء فبدأ "مهيطل" يتململ ويتقلب وهو يبتسم ويبدو أنه كان ينعم بحلمٍ جميل حيث يأكل رز مع الفضائيين.
فتح عينيه وهو يحتفظ بتلك الإبتسامة المشرقة وقلب نظريه بين "جعيدي" و"008" ثم قام يتمطع وتمتم بصوتٍ خفيض:
-الكلام على إيه؟
-يلا نقتحم المبنى.
-بس النهارده اجازة رسمية، اليوم العالمي للأخ.
-من النهارده مفيش اجازة أنا الأجازة.
تقدم العميل "008" "مهيطل" و"جعيدي" حتى مدخل "السجل المدني" فوجدوا ذات الرجل الذي وقف ليلة البارحة وقد إرتدى قميصًا صيفيًا مخططًا بنصف كم وبنطالًا جبردين كحلي آخر شياكة.
قال العميل "008":
-ايه، جرى ايه؟ مزعلين الولاد ليه؟
تململ الرجل وتصبب العرق من جبينه وقال بنبرة مرتعشة:
-حضرتك إحنا مش قاصدين نزعلهم، كل الحكاية إن إمبارح كان عيد يوليو تمام والنهارده اليوم العالمي للأخ وبكره عيد الأخت وبعده عيد أعز الولد ولد الولد.
-اه I see.. طيب قدامكم نص ساعة إلا خمس دقايق تكون مدام كوثر ومدام صافيناز ومدام جيلان وأستاذ عيد وأستاذ عاطف وأستاذ مينا والفراش وكل طاقم موظفين السجل المدني حاضرين عشان الأولاد يعرفوا يشوفوا شغلهم وتقدملهم طقم شاي وسندويتشات جبنه فلامنك وزمزميات و2 شيبسي بالشطة والليمون.
نظر "مهيطل" إليه في إعجاب وقال:
-عفارم عليك يا عميل "008" انت عملت اللي "سعفان مدخنة" مقدرش يعمله.
-العميل "سعفان مدخنة" انتوا لجأتوا ليه؟!
-إضطرينا للأسف.
-حسابي معاكم بعدين والحساب يجمع وكلوا بتمنه ودلوقتي إتفضلوا إدخلوا المبنى تجولوا في الأروقة والممرات والطرق ودورة الميه عبال ما الموظفين يحضروا وتعرفوا اللي بيحصل جوه.
-طيب ممكن قبل ما ندخل اسألك سؤال؟
-طبعًا يا عميل "جعيدي".
-انا دايمًا حاسس في عينيك حزن وبرغم أنك تبان قوي وجامد من بره وبتاع مهمات صعبة وبتخلص الواجب بتاعك قبل الكل لكن حاسك حساس ورقيق من جوه وضحتك بتدل على الم وشقاء وصفاء ممكن تقولي إيه حكايتك؟
-أنا كان ليا أخ بيغير مني جدًا إسمه العميل “007” بوند جيمس بوند جذاب لدرجة العذاب، كان بيحاربني ف لقمة عيشي إكمني نبيه أكتر ورياضي وبكرش وتخيل إني ممكن أمنع عنه رزق الشغل المخابراتي وأخطف منه حريم المهمات وحب يرميني ورا الشمس بس كان وحش في التنشين فجبني هنا وبقيت مشرف وموجه على أقسام المهمات الحساسة ومنهم الملفات السرية أوي وبصحح ورا اللي بيكتبوا التقارير وموظفين حسابات المهمات اللي فيها أكشن وحركات.
-مفهوم، مفهوم.
تجمع الموظفون في أسرع وقت وجلس كل منهم في مكانه وقد قذفوا "مهيطل" و"جعيدي" بنظرات نارية حمراء مرعبة حيث تسببا في قطع إجازتهم ونزهاتهم في جنيناتهم وملاهيهم وحمامات سباحاتهم.
وما زاد الوضع سوءًا هو إخراج "مهيطل" لصفارة والنفخ فيها بعزم ما فيه ليتجمع الموظفون ويقومون مرة أخرى من على مكاتبهم ومواقعهم بعد أن إترستأوا وفرشوا بسكويتهم وشايهم.
إنطلق العميل "جعيدي" بصوت جهور:
-في راجل دخل هنا شاب صغير وسيم طلع عجوز أضنته السنين، عايزين نعرف بالظبط ايه اللي حصل جوه أروقة السجل المدني، زميلي العميل "مهيطل" عنده نظرية خارقة للطبيعة وهي أن هنا في صدع زمني، والوقت بيمشي بطريقة مختلفة لذا الشاب دخل هنا ويكأنه سافر لكوكب سابح في الفضا على بعد 35000 سنة ضوئية من مجرة التبانة ولأ هو مكانش رافضك يا زماني يا مكاني يا أواني.. أنا عايز أعيش في كوكب تاني وأنا بختلف مع زميلي وشايفه متخلف عقليًا لكن طبعًا إختلاف الرأي لا يفسد للود قضية وعشان ننجح في التوصل للتفسير سواء الخارق أو المنطقي وهو الأقرب للمنطق والأصح والأفيد من وجهي نظري لازم نعمل محاكاة فأنا وزميلي هنمثل إننا الشخص اللي جي يستخرج البطاقة القومية ونشوف ايه اللي بيحصل ده ودلوقتي وقبل ما تتوجهوا كل إلى موقعه هنعمل واحد صفا وواحد إنتباه وهنحيي العلم ونعمل فقرة إذاعة مدرسيه...
"يتبع"
"تو بي كونتيود"
2
-2
