اليقين بالله والعلم يقيكم من فتن كتير. الجهل هو من أبشع الأمراض اللي ممكن تصيب الإنسان. تخيل كده إنك بتحب تغوص في التفاهة وتمنع نفسك من أي معلومة مفيدة، من أي مصدر للعلم سواء عن طريق القراية أو السمع. النتيجة إنك هتبقى صيدة سهلة لأي مستغل وأي شيطان، لأنك خليت نفسك وعاء أجوف مفيش حاجة جواك، أي حد بقى ممكن يصب ويملى الفراغ باللي عايزه، زي المعلومات المضللة وووعود الثراء السريع وتشويه خلقة ربنا وإقناعك إن ده جميل أو هيكسبك وقت أكبر وهتصغر في السن، سن إيه ده اللي تصغره، هتبقى بنجامين بوتن تفضل تصغر لحد ما تبقى نونا؟ واستبدال الأصحاب الصالحين بالأصحاب التافهين اللي كل اللي يهمهم هناكل في مطعم إيه وهنصيف فين وهنروح نتصور في المكان الفلاني الغالي عشان نبان إننا ننتمي للطبقة الفولانية، واللي هيصدق افتراءات على ديننا وكلام لم ينزل الله به من سلطان. إنما مع العلم كل ما تعرف عن تاريخ وتجارب الآخرين هتكتشف إن الدنيا بسيطة ولازم تكون بسيط وإن الايام دول مفيش حزن دايم ولا فرح دايم وأهم حاجة تكون بتتقي الله وبالك رايق، ويزيد يقينك بالله مع كل حرف بتقراه وتعرفه ووشك ده هينور من غير بوتوكس وفيلر، لإنك هتبقى عارف إن أيًا كان اللي عدى بيك فهو عدى بغيرك والكون بيمشي، المهم بس متعكننش مزاجك، وأهم حاجة بقى إنك هتبقى عارف إن جدودك مش قردة وإنك متطورتش من غوريلا لبني آدم بعقل وهتدرك إن اللي مش مصدق بنزول الإنسان على الأرض لإن ربنا أمر بكده وإنه في الأصل قرد ده بيتكلم من منظوره وتجربته، جايز عمل دي إن آيه واكتشف إن جده قرد، ملناش دعوة يا مهيي