الكرة الأرضية بتتقسم 3 طبقات : باطن الأرض اللي فيها النواة والمركز وطبقة الوشاح وطبقة سطح الأرض اللي بتتكون من قشرة رقيقة وكل طبقة من دول متقسمة لأجزاء تانية يعني تقريبًا الأرض سبع طبقات بعد توصل العلما للتقسيمات الجديدة دي
طبقة الوشاح اللي بعد القشرة الأرضية وهي تعتبر الطبقى الوسطى بتتميز بدرجة حرارة عالية جدًا ما بين 1000 و3700 درجة مئوية عند حدودها أما لو غصنا أكتر جوه الأرض وتحت طبقة الوشاح هنوصل لمركز الأرض (اللب) وهنلاقي الغليان ودرجة الحرارة بتزيد ، اللب الخارجي بتتراوح درجة الحرارة فيه ما بين 4500- 5000 درجة مئوية أما اللب الداخلي بقى فبتوصل درجة الحرارة فيه ما بين 5500-7000 يعني السطح هو الأبرد، وكل ما نخترق ونغوص نكتشف أن السطح ملوش علاقة بالعمق، باللي بيدور جوه الأرض وده ممكن يكون شبه مخلوق تاني من مخاليق الله واللي عايش على الأرض وشبهها وشبه حاجات كتير في الكون، الإنسان..
إزاي بيبان بارد، ردود أفعاله هادية أو حتى عادية بس لو إخترقت أول طبقة ف نفسه هتلاقي الحرارة بتعلى والأفكار بتزيد وتاني طبقة هتلاقي معاها حيرة واسئلة أكتر والحرارة بتزيد ومع تالت طبقى وساوس وأصوات كتير والغليان بيعلى وف المركز بركان ثاير بيفجر وبيكسح بس الإنسان لسه عارف يسيطر عليه عشان ميبنش وميطلعش على السطح، لسه عارف يشيل العوالم اللي جواه واللي في حالة غليان مستمرة زي ما الأرض محافظة على نفسها وقادرة توفر حياة للي عليها مع أنها لو سابت نفسها ، لو سابت الحرارة اللي جواها تتسلل وتتنفس هتنفجر زيها زي الإنسان....
2
-2
