-لعنة تانية؟؟ إتكلم، لعنة إيه دي؟

-لعنة غريبة وغامضة، مش عارف جايه منين ولا رايحه لفين ولا إيه سببها ولا بتسبب ايه.

-انا ليه حاسك بتتكلم عن الكلمات المتقاطعة في صحيفة الأهرام إصدار سنة 1950؟

-انا هحكيلك من البداية.

-ومتفوتش تفاصيل.

-الحكاية بدأت لما نزلت من بيتي ف يوم حر فيه رطوبة، الشمس كانت ساطعة والميه قاطعة والجلبية اللي منشرها وقعت على جارتنا باتعه.

-لأ مش للدرجة دي، ده مش مسلسل أبو العروسة هنعرف نقعد 90 حلقة، جري الاحداث شوية.

-المهم وصلت للكشك لابس الجلبية والscarf اللي لفه حوالين رقبتي ده اللي بيجمع بين الاستايل والهيبة ، كان فيه بوادر لشبورة بس كانت خفيفة وبرغم حيرتي واستغرابي لأننا كنا ف شهر 10 والجو كان معتدل مائل للحرارة على السواحل وفي محافظات الشمال والسحب غير منخفضة وفي موجة إحتفال أعياد ميلاد ل90 مليون مصري مواليد برج الميزان، وانا بستعد للشغل وبظبط البضاعة إذ فجأةً الشبورة زادت بشكل مريب واستنيت رد فعل عمرو أديب، ومن وقتها والأحداث المريبة حصلت، الحدث ورا الآخر، بعد ما الوغدين ادوني 15 جنيه بس وكان فاضلي 5 جنيه اديهوني في صورة لبان وبسكويت وطلعوا يجروا وجريت وراهم، دخلوا بيت غامض وطلع بيت أشباح وحصلهم أهوال جواه، من أول شبح الست الغامضة المثقفة اللي بتقرا "ميكي" و"سمير" و"روايات عبير" لشريط الفيديو المرعب الخطير اللي طلع فيه بير مهجور ومراية مدورة وأغنية بكار والتليفون اللي جالهم بعديها وأخيرًا الأوضة المخفية وحبستهم بين حيطانها مع أغاني محمد محيي للأبد...

-طب وفيها إيه، كل ده ممكن يكون متعلق بالشبورة الماورائية يا حبة عينيا.

- استنى عليا كده شوية..... دول مش أول دفعة أوغاد، في حبة عيال تانيين جم بعديها في سن الإرهاق بالشنبات الخضرة المنبتة لسه مدركين أن مني زكي وحنان ترك اتنين مش شخص واحد وسرقوا مني حبة بضاعة، المهم جريت وراهم وملحقتهمش، وبعديها بفترة جالي واحد منهم الكشك وحكالي عن أموات أحياء بيغنوا "بنت الجيران" طاردوهم وفرتكوهم الواحد تلو الآخر إلا الولد اللي جالي...

-عايز تقول إيه يا شرلوك هولمز عصرك وأوانك؟

-الولد...ده...هو...الوحيد...اللي...مسرقش...مني.

اتسعت حدقتا "مهيطل التعلب" وفُتح فاه عن آخره وسال لعابه على ذقنه من هول المفاجأة والتشويق.. لململم شتات نفسه المبعثرة في غياهب الألغاز والساسبنس ثم قال بصوت منخفض وحاد بطيئًا ليزيد الأجواء توتر وإثارة:

-أنت مش واخد بالك اللعنة متعلقة بمين يا سيدنا؟

-بمين؟

-بيك أنت، أنت اللعنة، أنت أنت ولا انتش داري انت انت حبيبي وناري.

-يا سلام، طب ما ممكن يكونوا الأوغاد دول ما ممرروش الرسالة لعشرة أشخاص ووقفت عندهم مثلًا.

-أنت لسه مجمعتش، موصلتش الخطوط ببعضها، أنت المشترك بين كل الأوغاد دول، وكلهم أدوك على قفاك، مفيش غير الناجي الوحيد اللي هو مكنش أذاك لذلك هو الوحيد اللي سلم، انا متأكد يا أنت يأما حاجة متعلقة بيك هي سبب اللعنة في المسلسل ده.

-معقول؟ أنا "عواطف عفاف المنياوي" يكون هو محور حكايتنا ولعنتنا ، يا فضيحتنا.

-ثانية واحدة كده وايت جاست اسكند، انت بتقول انت مين؟

-"عواطف عفاف المنياوي"....

تحركت مقلتا "مهيطل" في كافة الاتجاهات وتصبب عرقًا غير مصدقًا ما قد سمعه للتو....

"يتبع"

#الأوغاد_كمان_وكمان

#دوامة_الزمكان

#ياسمين_رحمي

(لا ينصح بقراءة الحلقات لمن هم أقل من سنتين ومن يملك مشاكل في القلب أو الضغط أو إرتجاع في المريء)