ليه الجميلات بشكل ملفت أكتر ستات معرضين للمرض النفسي؟

عادة الجميلة ، بشكل يلفت انتباه كل الناس في أي مكان تروحه، مع الوقت بتتعود على ده، وإن ده هو اقوى نقطة عندها، قوتها في جمالها الطاغي اللي بيفكرها بيه كل شوية الناس اللي بتقابلهم، القريب والغريب، وبرضه مع الوقت وتلقائيًا بتتكون عندها قناعة إنها تقدر بالقوة دي تتجوز أحسن وأوسم وأغنى راجل وتتعين في أحسن أماكن الشغل والناس تعمل لها حساب بس عشان جمالها، ومن الأعراض الجانبية وقوعها في حيرة مرضية عند اتخاذ كل قرار بيشكل نقطة فارقة في مستقبلها، الحيرة دي مصدرها هو قناعتها الراسخة إنها تقدر على الأحسن والأحسن وإنها ممكن لو اتسرعت في اختيارها تكون قللت من نفسها وضيعت على روحها فرصة أفضل، ومن الأعراض الجانبية برضه صدمتها أكتر من اي ست تانية لما بتتعرض للرفض أو لخيبة الأمل في شخص أو شيء كانت عشمانة فيه، مش بتاخد نفس جرعة الألم زي غيرها في المواقف دي، الجرعة بتبقى أكبر بكتير، لأنها في ظنها هي أفضل من الستات التانيين وتستحق الأحسن منهم، طب إيه الحل لست بالمواصفات دي؟ الحل إن مش لازم كل ست فاتنة (أو راجل وسيم بشكل ملفت) تعامل نفسها على الأساس ده أو تبص لنفسها من الزاوية دي، بمعنى إنها مطلوب منها ومن ولاة أمرها تغذية روحها بميزات غير الجمال، ميبقاش هو الأهم وهو المحور، يعني متبقاش شايفة نفسها جميلة زي ما تشوف نفسها مثلًا قريبة من ربنا وبتسعى لرضاه أو مثقفة ومهتمة بأمور أكبر منها، بعلم ينفع، أو ذكية اجتماعيًا وإنسانة خيرة بتسعى لفعل الخير دايمًا، يبقى الجمال مجرد عنصر من العناصر، اه عارفة إنها جميلة بس مدركة إن مش ده الأهم، أهو النموذج ده سوي جدًا نفسيًا ومتزن، ويحضرني حالات لبنات جميلة جدًا كنت بشوفهم حالهم بيسوء ومحتاجين لعلاج نفسي مكثف عشان تركيزهم على جمالهم، وحالات تانية كان بيتقال لهم إنتي مش عارفة قدر نفسك وجمالك وقد إيه مخبية جمالك وتقدري تبقي أكتر واحدة ملفتة، لكنها مكنتش مهتمة بإبراز جمالها على قد ما هي مهتمة الناس تتعامل مع فكرها وإنسانيتها. لو لاحظتوا إن ولادكم حادين الجمال خدوا بالكم منهم عشان يطلعوا أسوياء بلاش تغذوا فيهم المظاهر وحب الدنيا