الاطلاع وتجميع المعلومات بالنسبة للكاتب مش رفاهية، مش حاجة ممكن يعملها وممكن يستغنى عنها، لأن أغلب الحاجات والمواقف والمعلومات إللي بتعدي عليه ، إن مكنتش كلها، بتخدم قلمه، خصوصًا لو بيمارس الكتابة بشكل احترافي شوية ، وكل شوية مطلوب منه قصة جديدة، هيجيب منين أفكار مبتكرة، أو هيحكي إزاي أفكار متكررة بس بطريقة ومنظور جديد؟ وهيملى إزاي قصته، إيه المواقف والمشاهد والحبكات إللي ممكن يستعين بيها عشان القصة تبقى غنية كحوار وحبكة وشخصيات؟ للسبب ده لازم يسعى أنه يلم معلومات من كل المصادر الممكنة على مدار الساعة، من قراية كتب لمشاهدة فيديوهات لسماع بودكاستس للإنتباه للحوارات اليومية اللي بتدور حواليه من ناس قريبين منه وناس غريبة في الشارع أو المصالح، لازم يغذي عقله عشان يقدر يستمر...