ابو هيبه

كائن صغير ولا بيهش ولا بينش ولا ليه نفع ولا ضرر واضح للإنسان إنما ليه هيبه وشنب رهيب يكفي أنه يدفع إنسان بالغ عاقل رشيد أنه ينط من الشباك طب ايه قصة الصرصور ده اللي بينتهي ف ضهر الحذاء أو اللكلوك وتاريخه على الأرض ..هو مبدئيًا من سكان الأرض الأصليين، من أقدم الكائنات الحية على كوكبنا اللي بيضيء المحيط حوله من الفضاء المظلم، وتقدير عمره مختلف عليه ما بين 50 مليون سنة و250 مليون سنة وخلال خمس موجات إنقراض الصراصير نجيت ولو افترضنا انها بقالها 50 مليون سنة فهي كده تسبقنا ب46 مليون سنة لأن آخر تقدير تقريبي لوجود الإنسان هو 4 ملايين سنة..
في العالم 3500 نوع من الصراصير

كل أنواع الصراصير دي إزاي بقى بتقدر تتجاوز الكوارث وموجات الإنقراض ، هي بتتمتع بنوع من الكروزومات في جيناتها الوراثية تحول بينها وبين الهلاك وعلما الأحياء والبيئة بيجتهدوا عشان يحللوا الجينات الوراثية بتاعة الصرصور أبو هيبه عشان يتوصلوا لعقار واقي من الإشعاعات النووية!

لحد النهارده العلم بيقدر موجات الإنقراض ب 5 موجات وكل موجة إتسببت في إبادة 90% من المخلوقات الموجودة وقتها وف آخر موجة الديناصورات هلكت وإنقرضت والناجي كان الصرصار أبو هيبه اللي مفيش حاجة بتقف قدامه من الكوارث (غير بأمر الله أكيد)

وفي نظرية بتقول أن الصراصير هتستمر حتى لو حصلت إنفجارات ذرية تشيل كل المخلوقات.. الصرصار أبو هيببه برده هيفضل ويستمر (إضرب كمان وكمان هطلعلك ف كل مكان)

وتلخيص القدرة دي جت في عبارة اللي قالها مش معروف الهوية : "الحرب النووية لن تكسبها أمريكا ولا روسيا ولا الصين، الرابح في الحرب العالمية الثالثة سيكون الصرصور" (أبو هيبه)

ده غير بقى أن أبو هيبه بيقدر ياكل أي حاجة من التراب للكحك ومن الخشب للبلاستيك ويقدر يجري بسرعة فظيعة (5 كيلو في الساعة) وزي ما بيهرب من ضهر الحذاء يقدر يهرب من كوارث تانية أكبر بكتير ويقدر الصوصور يضغط نفسه بحيث يدخل ف أي جسم مهما كان حجمه ضيق ولو أنبوب متناهي الصغر ويقدر أبو هيبه يتحمل الجوع 3 شهور والعطش أسبوعين أما قدراته الحسية رهيبة فمن خلال حاسة الشم بيتنبأ بقرب أي مخلوق ومن ريحة المخلوق حتى لو مش موجود بيعرف أنه كان موجود من وقت قريب!

لو فكرت تستخدم مبيد حشري ف مواجهة أبو هيبه هتنجح في الأول وبعدين تندم..عشان هيولد ذرية تتأقلم وتكون مناعة وهيغلبك زي ما غلب زلازل الأرض والإبادات الجماعية والحروب العالمية

لو فاكر أنك لما ترفع حذائك ممكن أبو هيبة يصيبه سكتة قلبية تبقى غلطان الصرصار مش بيعاني من أي أمراض قلبية عشان معندوش قلب (خطير رهيب فتاك معندوش إحساس) وبدل القلب عنده أنابيب ضاغطة بتحرك الدورة الدموية ولذلك لا بيتعب ولا بيجيلوا ضعف ولا قلبه بيتكسر..

ولو متخيل أن لما راسه تتقطع أبو هيبه هيموت تبقى غلطان! بيفضل حي شهر كامل بعد كده عشان معندوش أنف ولا رئتين (ولا رقبة تتكسر ولا إحساس ينفطر) والأكسجين بيوصل للخلايا عن طريق الشعيبات متصلة بالقشرة الخارجية..

ده غير أن أبو هيبه يقدر يقعد من غير نفس 45 دقيقة من غير ما شعره منه تتهز..
وعلى فكرة أبو هيبه خالي تماما من البكتيريا والميكروبات وأخيرًا أحب أبلغكم أنه لو لمس إنسان بالغلط بيجري مش عشان خايف بس عشان ينضف نفسه ويغتسل لأنه بيقرف مننا