نبيل الحلفاوي مات.. 

لا إله إلا الله 

أكتر وش مصري صادق معبر واثق حنون 

ممثل عظيم وإنسان أعظم

تحبه من غير سبب وبسبب، وتستنى كلامه وتمثيله وتكشيرته وضحكته.. 

لو ممثلش إلا دور رفاعي في زيزينيا كان يكفيه يعمل تاريخ تمثيل رائع.. لكنه عمل كتير .. كل ما كنت أشوفه في الهجان أقول دا المنافس الحقيقي الوحيد لطغيان جاذبية يوسف شعبان في المسلسل.. وفي ونوس كان هو إحنا.. الإنسان المعذب بنفسه الشقية التواقة التوابة.. حبيب ربه اللي غفر له في النهاية وسامحه رغم كل خطاياه..

وشه المصري الأسمر وملامحه اللي فيها حدة تخليك تخاف ليزعل منك، وفيها طيبة تطمنك له بدون كلام كانت دائما بتفكرني بوش وملامح بابا في فترة من فترات عمره وكنت بشوفه فيه كتير قوي..

كنت تحسه مترفع وشبعان وصاحب مبدأ ومتسق مع نفسه ومخلص لما يؤمن بيه من أول حبه الجارف لمصر لحد الكورة وآراؤه الحماسية والناقدة فيها..

كان جميل بحق 

ربنا يرحمك يا نبيل يا حلفاوي ويقبلك عنده بما يليق برحمته ورضاه.