بشتغل على ترجمة كتاب حاليا هيكون من أهم وأعظم ما ترجمت بإذن الله.. أنا عينيا تعبانة ودماغي مفشفشة وصحتي فعلا مش حمل الجهد الخارق اللي الترجمة بتحتاجه، خصوصا إن الكتاب متخصص ودقيق وطبيعة تنسيق صفحاته مزعجة جدا..
كل يوم أقول لنفسي كلمي الدار واعتذري عن الترجمة وقوليلهم إنك مش هتقدري تسلمي الكتاب في معاده ويمكن مش هتقدري تكمليه أصلا.. وأقول فعلا هعمل كدا بكرة.. وبعدين ربنا يكرمني بشوية عافية قد بوق النملة، أقوم فاتحة الشغل واترجم شوية، ألاقي الكتاب جمييييل والموضوع عظيم والترجمة بتحققلي أقدم وأغلى السعادات كعادتها معايا من يوم ما بدأت اشتغل فيها من سنين السنين.. أقول يا بت اجمدي وكملي واعتصمي بالله وبعزيمتك.. متعتذريش عن الكتاب ومتقوليش مش هقدر أخلصه.. هتخلصيه وهيكون تحفة علمية ولغوية وهتنفعي بيه الناس اللي محتاجين موضوعه وهترفعي بيه قدرك قدام ربنا وقدام أهل الاختصاص وقدام نفسك كمان..
إنتي شاطرة يا راقية وبتاعة بطولات.. دي بطولة جديدة ويمكن أصعب من أي بطولة فاتت.. بس انتي قدها
يا رب خليني قدها ❤️
2
-2
