"وأُحِيطَ بثمَرِهِ، فأصبَحَ يُقلِّبُ كَفَّيْهِ عَلَى مَا أنْفَقَ فيهَا وهيَ خَاوِيةٌ علَى عُروشِها ويقولُ يا لَيْتَني لَمْ أُشرِك بربِّي أحَدا"
صدق الله العظيم
هو زرع وروى وعمل كل حاجة عشان جنينته (جنته بحسب التعبير القرآني النبيل) تفلح وتبقى هي الأكبر والأعظم.. بس فاته حاجة واحدة مهمة جدا .. إن الأمر آه بيتم بالأسباب، لكن لما ربنا يشاء.. يعني علينا نسعي وناخد بالأسباب عشان نحقق اللي بنسعى له.. لكن بدون غرور بسعينا دا ولا تصور إنه لوحده كافي.. لازم نكون على يقين تام إن السعي مهما بلغ (على ما أنفق فيها) مش هيحقق الهدف منه بدون أمر إلهي بالتحقيق.. وإن رفض الفهم دا لمسألة تحقق المساعي نتيجته باترة (أُحيط بثمره) يعني كل ثمار ما زرع ضاعت وراحت كأن لم تكن.
وقوع الأحداث لها شقين.. شق السعى، ودا لازم عشان الدنيا أصلا ماشية بالأسباب وربنا أمرنا نتبع سببا.. ودا الجزء اللي في إيدينا .. والشق التاني هو المشيئة الإلهية، ودي حاجة كدا برة أي حساب أو توقع.. هي شرط تحقق نتاج السعي.. من غيرها بيكون السعي بلا قيمة ولا نتيجة.
المفارقة الأعظم هنا بقى إن المشيئة لوحدها بدون السعي تحقق أي حاجة وكل حاجة.. ربك لما يقول للشيء كن بيكون على طول.
يبقى نقعد نستنى المعجزات؟
لا.. إحنا نؤمن بيها، لكن لازم نسعي.
هي الحسبة كدا.. إعمل اللي عليك واطلب من ربنا يهيأ أسباب القبول.. لا ينفع تقعد مستني معجزة وانت قادر عالسعي، ولا ينفع تضمن تحقق أمنياتك بسعيك لوحده
إن كان عاجبك يا مؤمن.
2
-2
