ربنا يخلي الشوارع والمحلات والبياعين، والفصال الحنين والوزن المتوصي والضحكة الحلوة، وخاطر الزبون ومراضية البياع.. 

ربنا يخلي كل باب سعي مفتوح لصاحبه وعمران وشغال وساتره، ويخلي كل مشتري هين لين لطيف، وكل بايع أمين حقاني لطيف برضو.. 

السوق هو أكتر مكان تشوف فيه الناس على حقيقتها في وسط الزحمة والبحث عن الاحتياجات ومواءمة المتاح مع المطلوب، والمعاملة بين الناس بالفلوس ومحاولات الكسب في مباريات صغيرة متكررة على كل باب محل وكل مكان فيه بضاعة صاحبها عايز يبيعها بأحسن مكسب وشاريها عايز ياخدها بأقل سعر من غير ما حد فيهم يظلم التاني. 

ربنا يخلي الأمان في نفوس الناس وهي ماشية تدور بعينيها وتشيل في إيديها وتحسب حسبة اللي اتجاب واللي ناقص واللي لازم ييجي واللي ممكن يتأجل.. 

ويخلي شوارعك يا مصر منورة وعمرانة بأهلها بياعين وشاريين، وبضايعها الحلوة الكتيرة اللي بتناسب كل واحد على حسب حاله ومبتخليش خد يروح زعلان.