مؤشر سيء جدا

مؤشر سيء جدا....وممكن سببه هو ظهور السوشيال ميديا في الاساس

الناس قاسيه اوي من ورا الشاشات....النقد غير ادمي بالمره ...لو اتنين تلاته اتفقوا يقولوا راي " غير منصف" هتلاقي 100 بيرددوا وراهم الرأي ده بدون اي عقل لمجرد ان عقلهم اتبرمج على كده .....وال 100 هيبقوا 200....و 1000 ...الخ 

والعادي ان الناس بتتجه للسلبي دايما ....فالاراء السلبيه بتخاطب العاطفه اكتر .....وياسلام لو اتغلف بشوية صعبانيات او كوميكس !!!....

علشان كده ان حد يطلع بفكره جديده مثلا او اي عمل متكامل على السوشيال ميديا تعتبر مجازفه كبيره جدا ....ووارد جدا مايقدرش يستمر من اللي هيشوفه.....والمشكله ان الشخص ده ممكن يغلط مثلا في حاجه وده وارد ماهو "بشر" .....هتلاقى الناس سايبه كل حاجه حلوه وهتمسك في الغلط ....وتدبح الشخص من الاحساس بالذنب والتقليل والتطاول

تنظير الناس وقسوتها مبالغ فيه...ده غير امراضها النفسيه وحساسيتها من اي نجاح واي تميز....هيخلوا اللي عايز يبتكر....مايفكرش في ده....هيخلوا اللي عايز يقدم منفعة ما...يقول بلاش .....هيخلوا اللي عنده هدف مفيد او فكره جديده ....يقلق من التنمر اللي اكيد هيقابله من ناس مايهمهاش غير انها توقع اي حد بيحاول يطلع

ميزة السوشيال ميديا ان انتشارها سريع وتسويق ممكن بشوية خطوات يبقى تسويق جيد

بس مصيبتها الكبيره....ان برمجة العقول فيها سهله...القسوه سهله...والتنظير مافيش اكتر منه .....يخلي اللي عايز يعمل حاجه يقول بلاش .....راحتى النفسيه اهم

يا جماعه ارجوكم...اعرفوا عقلكم رايح فين....ماتخليش شوية كوميكس وشوية هزار وتنمر يحركوك في اتجاه معين او تكون سبب في هدم بني ادم على الاقل ببحاول يعمل حاجه 

المفروض والطبيعي والمنطقي ان الناس تساعد ان افكار جديده تظهر.......تشجع اللي عنده النيه او يبتدي بالفعل....علشان يقدر يعمل اكتر ويكمل الطريق امال هنتقدم ازاي؟....هنكون متميزين ازاي؟

مهم الناس تتفهم ان البشر وارد يغلطوا.....وان الكلمه ممكن تكون اخطر من حد السيف....وسهل جدا لو الكلمة استخدمت بشكل غلط تأخر وما تقدمش! 

وطبعا على اد مافيه ناس قاسيه ومابتحبش النجاح ولا الناجحين......طبعا فيه ناس كويسه ومحترمه كتير وعاقله....بس مش كتير محافظين على عقلهم للاسف ولا عارفين ممكن ازاي يسيطروا عليه! 

اللي عايز يقدم الجديد ....ويكون متميز ....لازم يجرب ويفشل ويجرب تاني ويقع ويقوم....وهكذا....لكن هل الناس هتسيبه يكمل الطريق؟....هل الناس هتتفهم ده ولا هيكون ماده للسخريه والتنمر والتنظير والتقليل.....والخ 

ربنا يكتر من الطيبين حوالينا :)