مافيش انسان طبيعي هيكون مبسوط من زيادة اسعار....لو حد قالك انه مبسوط فده انسان مش طبيعي نفسيا ...

ولكن في نفس الوقت الغضب واللي ناس كتير بتبرره ...انا مش هاضحك عليك واقولك يالا اغضب علشان ترتاح و اكسب فئة الغضبانين....لا مش هاعمل كده :) 

الغضب هيضرك لوحدك...ومش هيفيد باي شيء وده قولا واحدا ...واحب افاجئك ان الغضب مش هيجيب الا غضب زياده وهاتفضل في دايرة مغلقة ! 

وازيد من الشعر بيت....ان الغضب نتيجته " النقمة على النعمة الموجوده" واللي انت مش شايفها حاليا بسبب الغضب ....وايمانك هيتأثر وانت مش حاسس....والنتيجة؟ زيادة " وضعك" للأسوأ 

انا عارفة ان الكلام ده مابيعجبكش كتير.... وباتهم باتهامات مالهاش لازمة :) بس انا مش هاضحك عليك ! 

الواقع الحالي بيقول انك تفهم ...مش تغضب ....انك تعقل وماتسلمش عقلك ومشاعرك للشيطان وعواقب ده هتغرقك ....لو خايف على الرزق...فالرزق رزق ربنا....مش رزق قرارات الحكومة.....حتى لو انت شايف ان الحكومة قرارتها فاشلة....فرزقك و الوفرة فيه بايد ربنا "وحده."...وديه مافيهاش نقاش كتير :) 

لو آمنت بجد بالكلام ده....هتلاقي حتى لو الدنيا بتنهار حواليك والناس كلها بتشتكي.. بس هتلاقي نفسك انت متيسر بشكل انت ماتعرفش ازاي.....الناس كلها بتصرخ وربنا مطمنك برزقه ليك ....و انا عارفه ان كلمة " بس" هتكون حاضرة في اي اعتراض وخلاص 

ماعلينا :) 

الواقع بيقول ان اكيد مش من مصلحة الحكومة انها ترخم عليك وانت ماتعرفش من المعلومات الا قشورها....فامش من حقك تقول ايه اللي يتعمل وايه اللي مايتعملش..." انت مش جوه المطبخ " ....ونفس الواقع بيقول اننا حوالينا الحروب في كل حدودنا....حرب غزة مثلا اثرت علينا بشكل مباشر....ولو اعداءك راضيين عننا كان زماننا عايشين في رفاهية " بشكل مؤقت " ...بس بلدك هتضيع بعد شوية...ولكن انت مش مستسلم لاعداءك وواقف في وشهم....فطبيعي هيخنقوك بكل شكل ! ويسخنوا الشعب على صانع القرار ! 

قناة السويس فقدت ايرادات بشكل غير مسبوق بسبب حرب غزه وخلافه وده خبر كل المواقع كاتباه مش سر......اكبر مورد للعملة الصعبة متاثر بشكل مش طبيعي ...فانت منتظر ايه داخليا؟ 

تخفيف الاحمال واللي ناس ماقدرتش تستحمله....واللي نحسبهم مثقفين اتريقوا عليه عن جهل وقلة ادب....كان لتوفير العملة الصعبه بسبب ضعف موارد الدولة من العملة حاليا! 

خطة تخفيف الاحمال ابتدت تتلغي فطبيعي كان فيه مقابل لده ...فده حاليا الواقع...هنرخي في حته...هتتشد في حته تانيه ...وده الواقع 

مصر مش منتجة للبترول بشكل كبير...فامعتمدين على الاستيراد اللي اكيد عايز عملة صعبة....واللي بيغلى بسبب الحروب حواليك ...وطبيعي من ٢٠١٩ كان القرار ان المواد البترولية بتتسعر على حسب الاسعار العالمية ...فزيادة الاسعار عالمية مش محلية!

انا عارفة ان متوسط المرتبات هنا مش كبيره ومش قليلة....يعني ناس مرتباتها ضعيف وفيه ناس تانيه مرتباتها معقولة....وناس عالية ! 

بس الاكيد انه كله متاثر بنسب ! 

فلازم بقى قرارات نحمي اصحاب الدخول الضعيفة والمعاشات كمان ...الاسعار كمان لازم يكون عليها رقابة ورابط لان المشكلة مش في قرارات الحكومة فقط....لا فيه مستغلين كتير للازمات ...

اخيرا.....اللي مش عاجبه البوست يا جماعة ...فهي قناعات وانت حر في قناعاتك زي ما غيرك حر برده ! 

وربنا يفرجها ويرزق الجميع :)