بتمنى أرجع.

نفسي أرجع بنت صغيرة من تاني

البنت اللي قلبها مليان براءة وخفيفة زي الهوا

مش شايلة همّ حاجة كل اللي شاغلها إنها تلعب بالبلونة،

تتنطط وتجري هنا وهناك ومزاجها رايق زي نَسمة صيف آخر النهار

نفسي أرجع لأيام الطيبين

أيام ما كانت القلوب صافية والناس قلوبهم علي بعضها

أيام الجدعنة والشهامة اللي كانت مرسومة على الوشوش

الضحكة كانت طالعة من القلب والمساعدة كانت من غير مصلحة.

كنا زمان بنقول: "إمتى نكبر؟"

دلوقتي بقينا نقول: "يا ريت نصغر!"

بفتكر أوقاتي في بيت جدو وجدتي

الحنان اللي كان بيغمرني من غير ما أطلب،

حبهم الكبير اللي كان بيطمنّي من غير كلام.

ولما راحوا

حسّيت إني كبرت فجأة خمسين سنة

وكأن الدنيا اتبدلت

بقت دنيا تانية اتشال منها الطيبين

والقلب اللي كان بيضللك من قسوة الدنيا وغدرها.

تلاقي نفسك كبرت، وكبرت معاك همومك

كل سنة تعدي ناس تختفي وناس تظهر

والحياة كل شوية تغير وشّها.

تجارب، وأزمات، وضحك وبكا

وكل ده بيشكّلك بيوصلّك للنقطة اللي انت فيها دلوقتي.

أوقات ببص لحياتي كده وأسأل نفسي

"يااه… هو أنا كنت فين؟ وبقيت فين؟"

إزاي اتبدل حالي بالشكل ده؟

قد إيه الأيام عدّت وسابت فيا علاماتها

ومع كل سنة بتروح بتحس إن البراءة بتتسرسب منك حتة حتة

بس رغم كل ده بتتعلم تبص للحياة من منظور تاني

من زاوية فيها نضج أكتر وهم اكبر برضو

لما عقلي يوزني افتكر كل دا واسال عن الحياه افتكر اغنيه قديمه اسمها Que sera sera 

ومعناها ماسيكون سيكون 

When i was just a little girl i asked my mother what will i be..

Will i be pretty ..will i be rich 

Here's what she said to me Que sera sera whatever will be will be

The futures not ours to see

وانا صغيره سالت امي هل هبقي حلوه هل هبقي جميله هل هبقي غنيه ردت وقالت ماسيكون سيكون واللي هيحصل هيحصل احنا منعرفش المستقبل فيه ايه وبكرا مخبيلنا ايه 

ف بقول لنفسي كي سيرا سيراا واتفر ول بي ول بي❤️

ويختم كلامي ب الجمله الجميله دي 

Que sera sera🥀