أخوك

إوعي تفرط لحظة في أخوك

وامسك فيه بيديك وسنانك

ده لحمك ودمك وإبن أبوك

وساعه الخطر حصنك وامانك

ولو ظروفك ومعايشك غربوك

هو اللى حتأمنه على مكانك

ولو الناس غلطوا وسبوك 

حيجيب حقك ويرد مكانك

ولو في وقت الشدة سابوك

مش حتلاقى غيره قدامك

عشم ومحنة عليه يرموك 

حتطللب عينه يقول خدامك

ولو سألت سنينك حيجاوبوك

 وحيقولولك عمل كتير علشانك

لو زعلانين وبينكم خلافات

أقعد مع أخوك وإعرف ماله

وما تنساش إن إنتوا إخوات

والحاجه إللى مزعلاك قولها له

وسيبك من كل إللي فات

وماتشيلش من ناحيته وإصفاله

ورجع من تاني العلاقات

وإطمن عليه وإسال على حاله

ده إنت الوحيد عنده بالذات

غلاوتك زى غلاوه عياله

يعني من الاخر في كلمتين

نصيحه وياريت تعمل بيها

شوف إللي فرق بينكم مين

ورجع المياه لمجاريها

وما تمشيش ورا الشياطين

خصامكم لبعض ده مصلحه ليها

لا الورث ولا المال دايمين

ولا الحريم اللى ربك غضبان عليها

وإحنا ضيوف علي الدنيا يومين

 ومش حناخد حاجه منيها

حننزل تحت التراب فاضيين

اوضه متر فى متر حترقد فيها

واللي حياخد عزاك أخوك

يعني إمسك فيه بيديك وسنانك