يا مدام شاهيطاز !!

بما انها هدنة..نلحق نتعلم شويه قبل الجولة الجاية (٥) 

- هى مش دى حماس اللى قتلت ولادنا فى سينا؟ قالت بغضب...

آه هى يا مدام شاهيطاز العلا تحيا مصر..

- هى مش دى حماس اللى كان فى قضايا تخابر معاها..بتساعدوها دلوقتى؟ قالها بابتسامه صفراء مواربه..

آه هى يا اسلامجى ...هى بعينها و قضايا التخابر شغاله كمان..

يا حبايبى..اقعدوا انتوا الاتنين كده ...

العلاقات الدولية مش ماشيه تبع كتاب دكتور محمد طه "لا بطعم الفلامنكو" ..يعنى احنا مش بنبعد عن العلاقات التوكسيك و نسيب الخاينين وندور على ناس تانيين...

دى سياسة... مصالح... مبادىء ساعات كده يعنى...بس فى الآخر مصالحنا فين ونتكلم...كله ماشى كده بما فيها حماس...

الخلاف بدأ في وقت معين لسبب كلنا عارفينه...بعدها حصلت تهدئة و مصر شاركت في الصلح بين حماس وفتح "و رفعوا صور السيسي فى شوارع غزة..و ثار اخوان مصر ما ثاروا أيامها" ... و أزيدك من الشعر بيت...حصل خلاف بين حماس و الجهاد لما حماس تفاهمت مع مصر و بعدوا عن سينا " وصل لمواجهات مسلحة أظن فى ٢٠١٥/٢٠١٦" ...و كان فى روابط و علاقات وتعاون بين مصر وحماس برغم ردم الأنفاق و بدأ نوع من الهدوء ناحيه الجيش المصري واحيانا احترام "راجع...عزاء احمد منسى فى غزة ورفع صورة على المبانى بعد استشهاده من قبل ما يتعرف بشكل عام...تفتكر عرفوه منين او سمعوا عنه فين؟ واشمعنى هو من بين كل شهداء الجيش اللى عملوا معاه كده؟ اكيد كان له دور ما لا نعلمه حتى الآن " ...

و برده العلاقات الدولية فيها اتفاقات فوق الترابيزة وتحت الترابيزة.... وموضوع الحرب بالوكالة دا عادى جدا...حأقفل الأنفاق عشان اسيطر على الوضع في سينا...وانت حتبعد عن الشأن الداخلى...و انا حأسهل دخول اشياء معينة لك...اسمها كورنيت بقى..اسمها سوسن...اى كان...بس بشرط انك تحارب بيها عدونا المشترك وبس..تجيبها فى صدر ولادى حنرجع زى الاول....

فيا مدام شاهيطاز العلا تحيا مصر....السياسة خد وهات..والدم اه مش بيتنسى بس فى عدو مشترك ودى مقاومة..اساعدها طول ما هى بتشتغل شغلها كمقاومة و اديها على دماغها لو قربت منى....

ويا عزيزي الاسلامجى..مشكلتك انك عقائدى منفعل واخوك الحمساوى ناصح ونبيه...هو بيلعب مع مصر سياسة مش عقيدة...وهى كانت خناقة على كرسى الحكم و اتراضوا خلاص و راحوا يلعبوا دورهم الأساسى كمقاومة...

فهمتوا يا حبايبى؟!!!