صحيت النهارده لقيت نفسى عايزة أصبح على الناس العاديين..اللى معندهمش أزمات وجودية ولا معرفيه...ولا تداخلات حضارة و لا عمق أو تسطيح ولا حاجه من دى خالص.
البوست المتوقع منه يكون ألش؟ لا خالص...استعلاء من نوعية يا بختهم مرتاحين؟ لا طبعا كل واحد تعبان بطريقته.
كل ما فى الامر أن فى نقاش على صفحة صديق من الفيسبوك عن نوعية من الكتابات والترجمات بتروج لحالة متواصلة من السخط و الكراهية..تأصيل لدور الضحية و التلذذ بيه كمان .شعور بالأفضلية على الآخرين لمجرد أنك قريت كام كتاب قلبوا مودك لشخص يبادل ويتبادل الكراهية مع العالم كله بناسه وشجره و الليل وسماه ونجومه وقمره...من غير أدنى تساؤل عن (ماذا قدمت أنا للعالم؟) و (هل من الممكن أن أكون أنا المخطىء؟) .و تبرير النظرة المهببة دى هو (الإفراط فى الإحساس والوعى).
تذكرت بسببه قصة قصيرة قريتها زمان لا فاكرة فين ولا مين الكاتب...عن أربع إخوة ريفيين امهم حريصة جدا على تعليمهم..رغم انها أميه...الاولاد كبروا و اتعلموا لغات و أدب و بقوا ناس عميقة و مثقفة..بس بقوا بيبصوا لامهم أنها ( عاديه) ...( أنها لا تعرف شيئا عن أشعار لافونتين...لا تدرك جمال الفن...لن تفهم موسيقى شوبان..هل تظنها تعرف الحب؟! ) نظرة فيها إزدراء للأم بإعتبار محتواها الانسانى تافه..لحد فى يوم واحد منهم بيصحى بالصدفة و يمر بجانب غرفة الأب و الأم...بيسمع صريخ مكتوم و صوت صفعات عنيفة..و فى نهاية المعركة بيسمع أمه بكل ثبات و حزم ( أضرب كما تشاء..لن أترك اولادى و لن أسمح لك أن تمس مستقبلهم) ...عشان يكتشفوا أن أمهم تعرف معانى الحب و التضحية و الجمال و الشجاعة أكتر من اى شاعر أو كاتب أو فنان...
ايوه حضرتك أى ست غلبانه همها الوحيد تربى العيال و تستر البنات.. أى راجل على أد حاله بيصحى يروح وظيفته و أهم حاجه ولاده ياكلوا و يبقى فوقهم سقف... أى واحد منهم ممكن يعرف معانى إنسانيه أحلى و أعمق و أصدق من كل كلام الهرى و الهرايين و المتفذلكين...كفايه معانى العرفان فى دعاء الناس البسيطه لما تعملهم خدمة عشان تفهم أد ايه جواهم جمال ...يمكن هما أحسن كمان.على الأقل معندهمش إحساس بالاستحقاق الغير مبرر لكل خيرات الحياة وبالتالى بيكون عندهم إمتنان لكل خير أو لحظة سعادة ولطف تمر بحياتهم...
.احنا محتاجين نتكلم كتير عشان نوصل لمفهوم واحد من اللى هما بيعيشوه يوميا..أحلامهم العادية جدا ممكن تبقى اصدق و أنبل من أحلامك الكبيرة اللى انت بسببها بتبص للناس من فوق ( وهى على فكرة ممكن تبقى ابتلاء ليك مش حاجه كويسه يعنى) ....
اللحظة اللى حتبص فيها لانسان من فوووق و تتوقع انك احسن منه عشان قريت كلمتين..اعرف انك تحمل اسفارا...
يا فارغ...و طول ما انت عايش مود لماذا يكرهنى العالم رغم انى حلو وبسمسم دا مش حتوصلوا لحاجة عليها القيمة...
ايه يا عم؟ نيللى كريم عضتك فى رقبتك وانت صغير؟!
شغلولك ملعون ابو الناس العزاز فى السبوع ومن ساعتها مقلوب على العالم كله؟ ما تهدى يا ابنى انت وهو!!!
2
-2
