انا عارفه أن فى حكيم فرعونى اشتكى فى إحدى البرديات أن ابنه مش بيسمع كلامه وان الجيل الجديد ناقص ربايه....وحاسه انى الفنان محمد صبحي أو أحد شخصيات مسلسل لأسامة أنور عكاشة وانا بأكتب الكلام ده..بس ضميرى بيملى عليا أكتبه تخليص ضمير جايز أسمع من به صمم...أو عناد..ودا أوحش من الصمم...

١) حيحاولوا يفشلوك ...حيحاولوا يوفقوك و يحبطوك ويكسروك...

طب مش جايز بيحاولوا ينصحوك؟او ينقذوك أو يلحقوك؟ الاحتمال ده مش قائم مثلا؟ شايفينك ماشى غلط او بتتعامل باستهتار أو الأسوء..بتتعامل بثقة زيادة عن ما تنبىء به إمكانياتك ومستوى معرفتك ..والثقة الزيادة واخداك فى سكة مش ولابد لدرجة أنها مانعاك من التعليم ؟! جايز؟

٢) مش لازم اسقفلك على كل شيء تعمله حتى لو غلط...أنا مش مامتك..ولو مامتك بتحبك فعلا مش حتسقف لك على الغلط عشان تميز الغلط من الصح.. فكرة أن أى توجيه أو تنبيه أو تعديل على شغلك أو كتابتك أو العرض التقديمى بتاعك هو نوع من تكسير المقاديف أو لغرض فى نفس القائل دى حتمنعك من الاستفادة من الأكبر منك ...تفتكر انا حيلحق بيا أى أذى لو انت فضلت جاهل ؟ لا...بس انا اوجهك بينى وبينك وانت فى مرحلة تأسيس كاريرك أحسن ما تكبر و تغلط غلطة تفرج الكل على جهلك...وساعتها مش حيرحموك...

اللى ماما بتسقف له على كل حاجه وهو صغير.. الدنيا بتسقف على وشه وهو كبير.. والدنيا مش بتسقف بإيدها..دى بتسقف بطوبه...

٣) اللبانه بتاعه (مفيش تعليم فى مصر و الماجستير والدكتوراه دى كدبه والرسالة دى ضرب فى ضرب) ترميها من بقك وتقف عدل ....رسالة الماجستير والدكتوراه ممكن تكون وسيلة تتعلم بيها حاجات كتير...اعتبرها مشروع تدريب يا سيدى...مش شرط تطلع نتائج لكن اكتسب خبرات ومهارات وطور نفسك..على فكره رساله الماجستير بتاعتى نشرت منها اكتر من abstract فى مؤتمرات دولية....و مكلفتنيش فلوس كتير بس اخدت مجهود (جمعت بيانات فوق الألف حالة..و الرسالة كان فيها ٩٩٧ حالة) ...اتعلمت فيها ازاى اعمل master sheet ..ويعنى ايه data coding والتعامل مع الإحصاء الطبى بشكل واقعى ..وازاى اقرأ النتائج و اترجمها واربطها ببعض.. بعدها بالتدريج إيدى مشيت....

لكن ترمى شويه ورق مليان ترهات وخزعبلات...أو ترمى كلمتين ل chat GTB و تجيبلى ترهات وخزعبلات...وأراجعك أو اوجهك تقولى يا دكتور دى تمثيلية أو تمتعض اوى عشان شايف أن دا تضييع وقت... انت كده فعلا بترمى وقت ومجهود فى الأرض ولا منك اتعلمت مهارات ولا منك محترم قصاد نفسك ....انت عملت الولا حاجه...و حتكمل فى الولا حاجه 

٤) مهما كنت شاطر...لو انت شخص كذاب أو ملتوى أو غير أمين...انت لا شيء...الشطارة مش بس حفظ ورص ودش.. الشطارة انك تكون ذكى أخلاقيا برده وتقدر تكسب ثقة المحيطين بيك..واحترامهم...دا حيخليهم يدوروا عليك بعد كده ويفتحوا لك فرص ويكبروك..

لكن مهما كنت شاطر...ما دمت أخدت بادج الكداب أو المستهتر... محدش حيدور عليك..

وختاما...فيكم عيال تشرح القلب ...وناس محترمه الواحد بيدعى للى رباها...وعندكم وسائل تطوير ذات ومعرفة أكتر مننا بمراحل...و بيترمى لكم أساسات عن مواضيع سمعنا عنها واحنا مخلصين ماجستير...بس معظمكم للأسف معندوش "مينتاليتى" النجاح...آه والله...هى مينتاليتى النجاح دى اللى مودياكم وحتودى الكوكب معاكم فى داهية...

أهو الواحد قال اللى عنده..جايز الزمن يلف وأقع تحت ايد واحد منكم يعالجنى...اهو ابقى علمته أو رسمت له طريق بدل ما يعك فيا.....