رسالة مهمة إلى الجيل الجديد و الجيل المش جديد اوى..

فى سنكم..وهو مثلا وانا بأخلص ماستر..اتعرضت عليا حالة في مستشفى مرموق لمريض تحت التجهيز لزرع كلى....

سبب العرض كان ارتفاع أحد دلالات الأورام CA125..

طبعا المعروف عنه أنه بيعلى في حالات اورام المبايض اكتر.. المريض كان رجل..

والواحد كان قاعد في نعيم الجهل عادى.. الموضوع قلب نكته..و عملتوا لمستر فلان CA125 ليه...كركركرررر

ايه ده.. كررركررر..

المهم يعنى..بأبص لقيت الرقم في السقف..عالى جدا..

ما هو لازم لطشه من الحياة تطلع الإنسان من نعيم الجهل برده...أحد الزملاء اقترح أن التحليل غلط و العينه متبدلة..

دا تفسير مريح و لطيف ...

بس قلت اتاكد... المريض كان بيغسل بريتونى بقاله فتره و دى أحد الأسباب الحميدة لارتفاع النوع ده من دلالات الأورام..

التحليل مش غلط..و بتاع المريض...بصرف النظر عن أن مكنش له داعى يتعمل لان ملوش ابعاد تشخيص مثلا...

بس بيحصل..

سهل انك تاخذ معلومه بتهريج..أو استكبار..أو تفسيرات قاعدة معاك جوه نعيم الجهل...

بس مش حيحصل حاجه لو اتبرعت بربع ساعة من وقتك دورت شويه على تفسيرات أخرى.. على الأقل تفهم الملحوظ..تعزز معرفتك...

تضيف لنفسك..تاكد ملاحظاتك السابقة..

عشان المعرفة لا تنتهى...و حتى ما يحدث في الف من واحد في المليون وارد جدا يكون هو المريض اللى قدامك...

معلش كلنا بنتعلم..و حنفضل نتعلم وتغير قناعتنا لحد ما نموت...

بس الطلوع من نعيم الجهل لنعيم الوعى مش صعب

. بالعكس ده واجب مفروض عليك ما دمت اخترت تتعامل مع بنى ادمين...