رسالة لكل من دخل مطحنة النشر العالمي ..

ودى رسالة مهمة برده بس مش للجيل الجديد فقط..لنا كلنا ...كل من يدخل في مطحنة النشر العلمى ...هذه الرسالة لك...

فى إحدى جروبات التى يديرها باحث له كل الاحترام في مجال ما...و بيعمل هاشتاج في اخر بوستاته "الراسخون في العلم"...

مستر راسخ كان بيحكى عن تجربه ما بكل فخر ...وهى أنه بعت بحث لمجلة هنديه و البحث فضل هناك شهور وفي الاخر اترفض وان المراجع قال مجموعة تعليقات على البحث معجبتوش...

مستر راسخ اتفتح في وصلة من السباب و المعايرة لمراجعى ومحررى المجلة من (عباد البقر) ..وان ازاى توقع ناس بتسجد لبقرة أنهم يحكموا إنتاجه العلمى...و ختمها بأنه بعت ايميل المحرر ...بدأ بهاو دييير يو!!! وان البحث تم رفضه لأسباب عنصرية وأن مش معنى أن مجلتهم مصنفة دوليا أنها كويسه...و أنه شايف المراجعين غير مناسبين...

و راح لاطع سكرين شوت من الايميل بقى....

التعليقات بقى....حزن الحزن...و الأوحش أن فيهم شباب صغير لسه بيبدأ و كان ردهم "شكرا يا دكتور انك عرفتنا نرد ازاى"...

طيب..مستر راسخ..لو المجلة وحشه بعت لها ليه!؟

اللى رفض انت شايف أن مخه صغير لا يرقى لمستواك عشان "بيعبد بقر" ..طب لما يوافق على نشر البحث واحد ملحد....نتصرف ازاى؟ نشك فى بحث حضرتك ؟

الرد على المراجع والمحرر لهم اصول وقواعد..أولها انك متاخدش الأمور بشكل شخصي..نقد البحث مش معناه أنه بيقولك كلام يمس شخصك الكريم.. ابسلوئلى... بلاش شخصنه للأمور..

ثانيا... النشر العلمي كله قائم على peer reviewing يعنى مراجعة الأقران لعمل بعضهم البعض..يا سيدى اعتبره صاحبك الغشيم اللى خايف على مصلحتك وانت اديته البحث يراجعه وبيقولك رأيه...

ثالثا..كونك تاخد نقد البحث لأبعاد تانيه عنصرية وبدنجانيه ده مش صح..رغم أننا عارفين أنه بيحصل..بس لو اخدت ده تفسير لكل كومنت حتفوت على نفسك فرصة تطور وسماع رأى جايز يحسن البحث بشكل ملحوظ... الأحكام المسبقة بتمنع التعلم و التحسن...

رابعا...لا مينفعش تبعت ايميل تمسح بكرامته الارض..هو محسش أنه عنصرى بس احنا متأكدين انك not professional....

الرد على المراجع بيكون بصيغه علمية واضحة و مرتبة ومنطقية..مش حندخل لبعض في ماتش معايرة..

وعادى.. اينشتاين اترفض له ابحاث...ايه احنا احسن من اينشتاين!!!

اكيد الواحد بيتضايق..واكيد مش كل المراجعين ملائكه..و ساعات الردود بتكون فيها تعالى غير مبرر أو عجرفة..يا تسحب البحث ونشوف مجلة تانيه يا ترد ردود علمية برده..ضبط النفس اهم مهارة تتعلمها في حياتك...

اشتم فى سرك لو متضايق اوى وفى اول الايميل قوله 

Thanks sir for your valuable comments 

عادى...

و اه بيبقى نفسي اول ما بحث يتقبل ألف على كل المجلات اللى رفضته و اوريهالهم و اطلع لهم لسانى واقولهم اخدته ست ستك بس ده في دماغنا بس..أحلام يقظة مش بنحققها...

بهدوووء ...خدوا الأمور بهدوووووء...وراجع وابعت وراجع وابعت تانى لحد ما ربنا يكرم...

خدوا الأمور بسلاسة يا أهل العلم...لو انفعلتم هكذا فماذا تركتم لمحمد رمضان!!!!!