الا ايه مفهوم أن المرأة ملكة وكوين وبرنسيس دا يا جماعه ؟!
المفهوم دا افعوانى جدا..دحلاب كدا دحلاب...بيتقال عشان يبرر نوع من القمع ابو ابتسامه صفرا..يا ملكة متخرجيش..متتكلميش .متتعلميش ...ومحدش يشوفك ..محدش يسمع صوتك (هنا فى جز على السنان مع ابتسامه تحمل معنى التهديد) ...بكل توابع المفاهيم دى بقى ...انتهاء بحصر دور الملكة فى الأعمال المنزلية فقط ...وفى نفس الوقت التنمر عليها عشان "آخرها المطبخ" وغير مؤهلة لإبداء الرأي أو التعامل مع العالم...
و بيتقال برده للترويج لصورة انانيه استفزازية جدا...لبنات فارغين..متعجرفين متفهمش على ايه يعنى؟ ايه بصمتك في العالم يا قطة عشان العوجه دى كلها...ترويج لان احنا متخلقناش نشيل مسئولية ومهمتنا فى الحياة نتدلع..نبقى عاله يعنى على الحياة وملناش عازه ونايمين للضهر وبنعيط لو ضوافرنا اتكسرت و مستنيين الثرى العربى بقى..."باربى" فارغه متمحوره حوالين ذاتها و رغباتها و دماغها...
فى الحقيقة يا جماعه احنا مش كوين ولا برنسيس ولا أى هرتله من دى..احنا بنى آدمين ...لينا حقوق وعلينا واجبات ...الإنسان خلق فى كبد ..و انتى انسان وجيس هوات..ملطوطة معانا فى حوار الكبد دا ...لا حد ياخد حقوقك ويديلك بدالها بادج "كوين" وتمشى فرحانه بيه فرحه الاهبل كام يوم لحد ما يديكى على دماغك...ولا ينفع تتخلى عن مسؤولياتك فى الحياة سواء في بيتك أو شغلك أو مع عيلتك تحت دعوى انك "كوين" لم تخلق الا للدلع..أمال قاعده معانا بتسحبى من موارد الكوكب بلوشى! نطع قاعد معانا!
قال كوين قال! مسسسممم...
2
-2
