نظرية محاربة السرطان

محدش بيهزم السرطان عشان نقول السرطان هزمه...لا اللى خف خفة بمزاجه وانتصر..ولا اللى مات مات بمزاجه وانهزم..

...فلان يحارب السرطان...كنت شايفه انها تحفيز للمريض فى معركة مره و طويله ومتعبه...لحد ما قريت مقال لفت نظرى لنقطة مهمة جدا...المقال كان أيام وفاة جون ماكين بسرطان المخ..مانشيتات الصحف قالت ( السرطان يتغلب على جون ماكين...جون ماكين يخسر معركته أمام السرطان) ..كاتب المقال كان طبيب نفسى مختص بعلاج حالات الأورام وتقديم الدعم النفسى لها..

لما بنقول ان فلان ( يحارب السرطان) احنا كدا بنرمى عليه حمل مش بتاعه...زى ما نكون بنشيله مسئوليه مرضه و هو فى الحقيقة غير مسئول عنه...المرض لما بينتشر او يتطور بيبقى معناها انه شايف نفسه اتهزم...تطور المرض بيسيب إحساس بالخزى و الضعف ( انا ضعيف عشان كدا المرض هزمنى...انا محاربتش المرض كفايه...انا إرادتى كانت قوية بس واضح انى ضعيف و متخاذل..) و دا بيؤذى المريض مش بيفيده..استخدام مصطلحات حربيه زى ( معركة) بيستدعى مصطلحات تانيه زى ( الهزيمة..الفشل...الضعف...الانهزام)...و دا مش صح ومش حقيقى

مريض السرطان بيحارب فعلا...بيحارب نظرة الناس سواء شفقة أو شماته..بيحارب عشان يتحمل الآثار الجانبية للعلاج....بيحارب عشان يقدر يتقبل فكرة انه بياخد علاج غير شافى رغم كل آثاره الجانبيه مقابل كام شهر زيادة فى عمره ممكن ربنا يأذن بيهم أو لا..بيحارب الفكرة اللى حيفضل ماشى بيها و بيمارس حياته وهو عارف اللى جاى ايه و بيتكلم و يضحك و يشوف او تشوف بيتها وولادها...دى حرب كبيرة فعلا وهو محتاج فيها كل دعم ومساندة و مساعدة من المحيطين ..توابع السرطان وعلاجه على حياته هى دى ميدان حربه مش السرطان نفسه..

حتى اللى ربنا بينعم عليه بالشفاء...بيفضل عايش مع خوف دائم.... وظائف بترفضه عشان "احتمال" التعب يرجع..جواز فى حكم المستحيل بسبب مشاكل الخصوبة والانجاب و الخوف من رجوع المرض وليه نشيل حد تعبان ...توابع مش اى حد يقدر يعيشها..

لكن الحرب مع السرطان دى مش شغلته ولا مهمته ولا هو بيتهزم فيها عشان ضعيف ولا بيخف و يتحسن عشان قوى...

عارفه ان الكلام ممكن يبان حسوكه زايده..لكن مع الوقت اتعلمت ان الكلمة لازم تكون بحرص...و بيكون لها أثر نفسى مختلف تماما عما نتخيل...

ربنا يعين كل واحد فى معركته ...و يقويه و يسند ضهره