لا هى مش نهاية التاريخ اللى هى يوم القيامة يعنى...ولا الإنسان الأخير اللى هو حتقوم عليه القيامة يعنى...
نهاية التاريخ عشان مفيش أحلى من كدا...و الإنسان الأخير هو المؤهل للعيش بالحلاوة دى....
يأتى كتاب "فرانسيس فوكوياما" اليابانى الأصل فى مقدمة كتب مرحلة "العولمة" أيام ما كانوا بيعملوا لها أغانى... الشيوعية سقطت والعالم ثنائي القطب راح...وفضل قطب واحد بيترنح بفعل انتصاره فى الحرب الباردة...وبالتالى نقدر نقول إن اللى كتبه واحد سكران.
نهاية التاريخ....نظرا لأنه وصل إلى أقصى نقطة في التطور البشري على كل المستويات...ليس بالإمكان خلق عالم وحضارة بجمال الحضارة الغربية...ومش أى غربية.. النسخة الأمريكية البروتستانتية... التطور لن يكون فى قفزات خلاص..ليس هناك مجال للقفز عشان محدش حيقدر يقفز لأعلى..احنا جبنا سقف الحضارة...الجاى كله تحسينات و إضافات لنسق الحياة النهائى ده ...لكن المبادئ (هى هىء) و الأخلاق (هى هى هى) لن تتقدم وتتطور عن كدا..ولا فكر الإنسان (لا مؤاخذة) حيسمو عن كده...لهذا فهى نهاية التاريخ...
الإنسان الأخير بقى..هو إنسان نهاية التاريخ.. شكله ايه بقى هذا الإنسان ؟ خد عندك....
أولا...حنستبدل إله السماء بآلهه منزلية صغيرة....ايوه...كل الانتماءات والأفكار اللى بتخلى البشر يتجادلوا و يتنافسوا ويتخانقوا حتتلغى...و نحل محلها تنافس استهلاك...
أصل بيقولك هيجل اتكلم عن حركة التاريخ وقال إن الإنسان بتحركه الميجالوثيميا...أو نيل الاعتراف من الآخرين بالتفوق...وساعات الآيزوثيميا....دا يا دوب حق المساواة لو هو مضطهد... الإنسان في سبيل الميجالوثيميا بيعتنق أفكار زى الدين والقومية و الانتماء الثقافي...ويحس أن دينه أحسن دين و بلده أحلى بلد وثقافته أحلى ثقافة..و بعدين يبدأ فى خوض حروب لاجبار الآخرين على الاعتراف بتفوق وتميز دينه/بلده/ثقافته....ودى كلها انتماءات بتعمل صووداع...
نعمل ايه ؟ الإنسان الأخير مش حيصدع روحه ويصدعنا بكل هذا الهراء...حيبقى ابن الشركة متعددة الجنسيات....و حيوجه طاقة الميجالوثيميا عنده لحاجات مفيدة لحركة الاقتصاد و نشاط السوق..يعنى يحس بالتميز لما يبقى عنده أكبر عربيه..أعرض شاشه...أفخم بيت...أعلى برنيطه.....كلها حاجات تسد حاجته للإحساس بالمساواة من ناحية والتميز من ناحية أخرى...
ثانيا...بالتالى...وعشان يقدر يعيش في نهاية التاريخ.. الإنسان الأخير حيتبنى "طوعا" الثقافة الغربية ويتخلى عن ثقافته وانتماءاته الأخرى اى كانت...عشان يعيش عيشه فل ويقدر يحرك السوق والاقتصاد...
طب البوذية يا سيدنا؟ حلوة بس بتدعو للتشقف...حيسيبوها...طب المسيحية يا سيدنا ؟ البروتستانتية بس اللى حتقدر تعيش لكن باقى الملل لا...مش حينفع تعيش ؟ طب الاسلام يا سيدنا ؟ حيفلفص شويه بعدين أهله حيلاقوا أنهم متخلفين ورا البشر حيرموه ويجروا ورانا ...واللى مش حيجرى ورانا حينقرض...
بالتالى كمان كام سنه أو كام عقد... الحضارات الأخرى حتلفظ أنفاسها بتنهيده واهنة كإحتضار رجل عجوز... مفيش مقاومة ولا خناق ولا تخبيط....وحدها الحضارة الغربية اللى حتعيش عشان كله حيحب ويختار أنه يعيش في ضلها..عشان دى نهاية التاريخ ومفيش أحلى من كدا...
فيعنى متصدغناش بانتماءاتك و ثقافتك وتنوعك...هو شكل واحد للحياة وحضارة واحدة اللى حتعيش وتقش...
وقوم نادى على الصعيدي واليابانى وابن اخوه اللاتينى و الشرق اوسطى وكله حيبقى زينا..غربى بروتستانتى يرتدى ملابسنا ويتحدث الانجليزيه و يتنطط على خلق الله بمقتنياته...وبس كده...
2
-2
