منتجات لا تحافظ على الجودة

الشهر اللى فات كان ليا تجربتين مع منتجات مصريه..من اللى أول ما ربنا يفتح عليه يسمى نفسه لوكال براند...

الأولى من براند لبس جبت منهم بنطلون السنة اللى فاتت و عجبنى جدا قصته مضبوطه وخامته حلوة ومريح و بعد استعمال سنة شكله مازال حلو وشيك..قلت هاتيلك لون كمان...

شىء ما خلانى بدل ما اطلب اونلاين بحكم انى عارفه المقاس والموديل قلت استنى شوفى الخامة وقيسى تانى..لهم ستاند في "لوكالى" سيتى ستارز...

ودا من ستر ربنا عشان الخامه من أسوء ما يمكن... شفافة جدا رغم أن البنطلون المفروض كحلى و الخياطة منسله رغم أنه على الشماعه لسه متلبسش...

التانى مع براند شنط ...كان عندي منهم شنطة سفر جلد ممتازة...استعملتها حوالى ٥-٦ سنين و متينة وزى الفل...قشرت قريب بس..

قلت يا نهى الدنيا غليت وخليكى في اللى تعرفيه ...هاتى نفس الشنطه من نفس البراند ما دام عاشت واستحملت ...

طلبتها...من اول لقطه...الهارد ويير مختلف.. القديمة كان لونه نحاسى وقيم جدا.. الجديد فضى عادى كده..قلت المهم الاستعمال...البطانة من جوه سايبه ومكلكعه و الفينيش مش نفس القديم..رغم أن البراند اصحابه طلعوا في شارك تانك و خدوا تمويل يكبروا شركتهم...

ليه؟ ليه نبيع دلوقتى بسرعه هوب نعمل اسم بدل ما نبنى ثقة بقى ...ننزل بسرعه عشان نتوسع بسرعه و الكواليتى في الأرض؟

سعر ويعتبر غالى ..وقلنا نشجع صناعة بلدنا...مش بتقدم منتج رخيص ولا بتخسر ....ليه متعملش لنفسك أسم ما دام ربنا كرمك ونجحت..شىء سىء وحزين الحقيقة..