فى جروبات الطبيخ حتلاقى ناس بتسأل على "ملح صينى" أو "جلوتامات احاديه الصوديوم" ...ناس كتير بتحذر منه بشدة وتقول إنه بيسبب مشاكل في الكلى و سوء تركيز وتدهور فى القدرات العقلية "ودا صحيح مليون فى الميه"..

ناس تانيه تدخل تقولك لا انا باستعمله "عاتشى" ومحصليش حاجه...

دا نموذج لمغالطه منطقية متواصلة من نوعيه "عملتها ونفعت" أو "عملتها ومحصليش حاجه" ...ما هو فعلا وارد..

تانى حنتكلم عن المخ الطبى والمخ الهندسى..احنا لما بنتكلم بنتكلم عن احتمالات...و الاحتمالات دى بتاخد مده متفاوتة من شخص للتانى عشان تظهر..

فكرة انك حتاخد قطعه فراخ بروست تنزل على الأرض تتلوى وتغسل كلى تانى يوم دى مضحكه جدا..تأثيرات كتير بتبقى تراكميه ..فبلاش تستعجل على رزقك دا اولا...

الاحتمالات بتقول أن مثلا ٩٠٪ من الأشخاص حيحصل لهم المرض الفلانى لو اتعرضوا للمادة x.. حضرتك اتعرضت لها ومحلصش حاجه..دا يخليك من ال ١٠٪ اللى محصلش لهم مرض..لكن مش بيجعل المادة x آمنه...فى ٩٠٪ حيتعبوا بسببها...

فأنا عارفه والله إن جدك كان بيشرب تسعين سيجاره فى اليوم لمدة سبعين سنه و كان بينزل الجيم لحد ما مات..و عارفه يا مدام انك بتطبخى لعيالك بسم هارى و العيال بتجرى فى البرارى والسهول...و عارفه أن كل البشر بيرتكبوا كم لا نهائى من البلاوى و جزء منهم مش بيحصله حاجه..و جزء كبير بيحصله..حتى المستشفيات مليانه وتشهد ..

فيا حبيبي لما تحدف زهر لفوق...متحدفوش غير وانت عارف ان كل الوشوش فى مصلحتك..عشان لو فيهم وش واحد ضد مصلحتك حتزعل وتجيب ناس تزعل..بس انا مش حأزعل واقولك انت عملت فى نفسك كدا..