اقرأ الاقتباسات الملحقة بالبوست...بتمعن...ها كلام جميل صح؟ ممكن تفتكر انه مقتبس من كتاب للشيخ الغزالى مثلا..

جيس هوات! مش من كتاب للشيخ الغزالى خالص..بس من كتاب بيتلعن كل يوم لكاتب لما بييجى اسمه اقل حاجه بتتقال من البعض...يلا ملناش دعوة ..اشارة لتجنب الخوض فى الأعراض يعنى

و الله بما ننا فى شهر مارس..شهر المرأة..الشهر بتاعنا..فأظن اننا محتاجين نتأمل قليلا فى المرأة ..ونشوف احنا مين وفين وايه وليه و اللى اتكلم عننا قال ايه..

مستعد للمفاجأة؟

الاقتباسات من كتاب (تحرير المرأة) لقاسم أمين...

اتذكر ابله (ن) فى ثانوى وهى بتحكى ازاى المؤامرات التى تحاك لأمتنا بدأت من زمان..و ان قاسم امين راح فرنسا جابوله هناك ستات عاشوا معاه اسبوع فى غرفته (وافهم بين السطور) فطلع بعد الاسبوع دا يقول (اريد من المرأة المصرية ان تكون مثل قرينتها الغربية) عشان هو عايز يعط ويكمل عططان و لما يرجع مصر مش عارف حيعمل ايه فقرر يبوظ المراة المصرية عشان يعط على راحته...

و اذكر برده بوست لصديق عزيز جدا لكن دا لا يمنع الخلاف..انه وضع مقارنه بين قاسم امين و مصلح آخر اظن يابانى..و اشاره مقتضبه ان قاسم امين راح باريس و رجع بالعار و الانحلال...

وفى وقت ما منذ فترة قريبه..ليه وليه كتبت فى بوست اسم قاسم امين..اسمه بس...ولقيت فوق ال5 آلاف شير نصهم (انا متفقه مع كلامها الا قاسم امين طبعا) و الناس ردت عليها (طبعا طبعا) عشان هوفاسق معروفة يعنى..

و اسطورة اخرى تساق ان من عاش على شىء مات عليه بدليل ان قاسم أمين مات مخمورا بين عاهرتين رومانيتين ..فمات فاجر عشان كان بيدعو للفجور...

وكل دا....بلح..ومش بلح بس..أثم وعدوان كمان ...

معلش عارفه ان الصدمة شديدة...ومعنى انك تصدق ان الكلام المكتوب طالع من قاسم امين ان الشيخ فلان والاستاذ فلان كلهم كانوا يا أما كذابين يا أما بيروجوا لكلام جهلة و محدش فيهم كلف نفسه يتأكد من صحة اللى بيروجه..انت دلوقتى دفاعك مش عن المرأة ولا الإسلام..دفاعك الداخلى انك رافض تصدق ان كل دول ممن تحسبهم على خير..كانوا فى احسن الفروض مخطئين خطأ غير متعمد..

أمال لما تاخد الكبيرة بقى ان مفيش مفكر انجليزى قال (لا بد ان نرفع الحجاب عن المرأة لنغطى به القرآن) حيحصلك ايه!!!!

قاسم أمين وكيل النيابة الشاب اللى حاول يهرب (عبد الله النديم) ادباتى الثورة العرابيه لما مثل امامه بعد سنين من الهروب..وكيل النيابة الشريف اللى كان بيحاول يخفف التحقيقات ويداريها لما تطول الشباب الوطنى ..الراجل اللى مات فى منتصف الاربعين فى بيته على فرشته جنب مراته بأزمة قلبية...(مذكرات سعد زغلول)

الهجوم عليه بدأ فى حياته..من اول طلعت حرب باشا ..الهجوم مكنش غيره على الإسلام..بس غيره واضحه على نظام اجتماعى استقر سنين واحساس بدونيه المرأة رسخ فى نفوس السيدات قبل نفوس الرجال..واصبح اى قدر من اعطاء الحقوق لها محل استهزاء.. واختفى النقد لفترة لحد المد الوهابى وموقفه الرافض لوجودنا على الكوكب عشان احنا اعوان الشيطان يعنى..معروفة..واصبح الرجل الميت الحى وجهه نقد وهجوم امثال حازم شومان اللى نفسه كل واحد يتجوز اربعه ويقعدهم فى البيت فتنتهى فتنه النساء ويختفوا من الشوارع ويقيموا جمهورية الذكور الفاضلة اللى احنا معكرينها عليهم دين ودنيا دى...

الكتاب نازل نسخة كاملة PDF على مكتبة هنداوى اونلاين..حوالى 120 صفحة..وموجود نسخة صوتية على اقرألى...120 صفحة ما فيهم كفايه انه يخليك تتسائل عن كتير من اللى اتزق فى ادمغتنا زق وقطع الطريق بينا وبين مصلحى ثقافتنا ومجتمعنا لصالح جحافل الظلام..كل دا لمجرد انه قال ان المرأة بنى إدم! بينما هى مش بنى إدم...هى حيوان فى صورة بنى آدم ..ولازم تعيش على كدا..