مارس و سرطان القولون

فى وسط الأحداث الحالية...نسيت أن مارس شهر مهم....شهر التوعية بسرطان القولون...

افتكرت النهارده لما شفت فيديو كيت ميدلتون "ربنا يشفيها ويشفي كل مريض"...

سرطان القولون على مستوى العالم بيشهد زيادة ملحوظة فى معدلات الإصابة به فى صغار السن "تحت ٤٥ سنة" مع مجموعة أخرى من سرطانات الجهاز الهضمي (وان كان هو متصدر) ...

الزيادة اكبر كتير فى معدلات الإصابة بسرطان المستقيم....

محدش فاهم السبب ..كلها نظريات...

جايز نوع الأكل ؟ جايز...التعرض للوجبات السريعة في سن صغير أفسد أنسجة القولون بدرى..

جايز الاستخدام المفرط للمضادات الحيوية في سن صغير غير طبيعه بكتريا القولون وخلق بيئة قابلة لحدوث طفرات سرطانية ؟ جايز....الميكروبيوم لوحده قصة كبيرة...

ليه؟ محدش عارف...

بس اللى نعرفه أن سن الكشف المبكر عن سرطان القولون نزل من ٥٠ إلى ٤٥ بناء على توصيات لجان علمية كتير...ومرشح للنزول إلى سن ٤٠ سنة ....

كل الأرواح مقدسة على فكره....

ربنا يشفى كل من خاض/يخوض تجربة المرض...

ويعين كل من لامس المرض حياته بشكل مباشر أو غير مباشر....

افتكروا مرضانا كتير وساعدوهم وكونوا لطاف معاهم .....وادعوا لهم ...

(ملحوظة...انا معرفش كيت ميدلتون عندها ايه بالضبط....بس شكلها كده يا قولون يا مبايض)...