ايه معنى الحضارة والتحضر؟ وايه تعريف الإنسان المتحضر؟
نفترض اننا أمام رجلين ...رائد فضاء محاط بالأجهزة المتقدمة وأعلى تكنولوجيا..و له معدل ذكاء خارق ..بيسمع موسيقى كلاسيكيه رفيعة المستوى و يقرأ لموراكامى مثلا...و فى هذه الأثناء بيضغط زر إطلاق صاروخ حيمحو مدينة كاملة....فى نفس اللحظة الرجل الآخر ولنقل من قبيلة أفريقية بدائية..لابس يا دوب ما يستر عورته وماشى حافى ولا يعرف القراءة والكتابة..بيقفز فى نهر عشان لمح طفل بيغرق..الطفل لا تربطه به أى صلة ولا يعرفه..و التيار شديد واحتمال موته عالى جدا...
من من الرجلين نعتبره "متحضر"؟ و أى نسق ثقافى نعتبره متحضر ؟ اللى ربى الأول ولا التانى؟
زمان أيام الشباب ..أيام ما كنت حأغير العالم بأفكارى 😂 كان فى بلاتفورم على موقع فلسفة تبع جامعة جورج تاون...بيطرح فيه هواة الفلسفة من أنحاء العالم أسئلة لفتح نقاش حوالين موضوع او سؤال..
أيامها بقى كان لسه صموئيل هننجتون منزل كتاب صدام الحضارات وخطوط الصدع الحضارى ووراه فرنسيس فوكوياما منزل كتاب نهايه التاريخ والإنسان الأخير والاتنين ميفرقوش عن بعض أوى..لكن دا قادتى لسؤال..ايه معنى الحضارة والتحضر أصلا؟
الموضوع كان لطيف وشيق جدا والإجابات والمناقشات كانت حلوة مع تاتش من مثالية جيلنا على مستوى العالم و حبه عجرفة أكيد...
لكن بعد السنين دى... محتاجين نسأل تانى...أحب أعرف آراء و نسميها دعوة للنقاش..ومين عارف يمكن تطق فى دماغى ونعمل دعوة كل فترة للنقاش فى موضوع و نتحاور وكده .
2
-2
