ليلى العطار...سها بشارة..

على صفحة الجميلة طاهرة عامر ..وهى صاحبة أحد ألطف البروفايلات فى الغرفة الزرقاء...لقيت صورة لسيدة جميله كجميلات الأساطير...الفنانة العراقية ليلى العطار..مديرة متحف بغداد للفن الحديث و أحد رموز الفن العراقي...

ليلى العطار استشهدت فى استهداف أمريكى غريب لبيتها...بيت عادى جدا بعيد عن أهداف القصف الأساسية..استشهدت هى وزوجها و مربية ابنتها...سنة ١٩٩٣ظهرت إشاعات أن الأمريكان اغتالوها عشان رسمت صورة "بوش الأب" على أرض مدخل فندق الرشيد الشهير ببغداد...لكنها إشاعات غير مدققة المصدر...

معرفش ليه افتكرت سها بشارة... اللبنانية النحيلة ...معتقلة سجن الخيام الإسرائيلي بجنوب لبنان...عشر سنوات من الاعتقال قضتها الصبية العشرينيه بعد محاولة فاشلة لاغتيال "انطوان لحد" قائد جيش لبنان الجنوبي الموالى لإسرائيل..وأحد المتورطين في مجازر صبرا وشاتيلا..لحظة خروجها وهى مبتسمة من المعتقل سنة ١٩٩٨ كانت لحظة درامية جدا لجيلنا...آخر جيل يهتم بالقضية الفلسطينية...أتذكر أنها ظهرت فى مكالمة هاتفية مع حمدى قنديل الله يرحمه...صوتها رقيق وهادى وبتهزر ...

الغربية أن الأفكار اللى جت فى دماغى ساعتها... ملهاش علاقه ببعض جايز ولا علاقة بالسيدتين...بس خلينا نقول:

- مين أقنع البنات والسيدات أن شغلتنا فى الحياة نتدلع ونسوى شوبنج بفلوس ابوطلال؟ مين بيحاول يمرر فكرة المرقعه الفطرية للسيدات بالتالى أى نوع من الشغل أو الفكر المسئولية تعتبر ضد "فطرتها"؟ حمل بيولوجي زائد احنا؟  

ما هو اللى معليهوش واجبات ملوش حقوق..حتى العيل الصغير بياخد واجب يا جدع..انتى يا شحطه مش حيبقى عليكى واجب؟ 

الأفكار دى زيها زى أفكار الحوريات بالضبط..نهايتها عزل للمرأة عن إنسانيتها ..... الإنسانية ام حقوق وواجبات دى..تعمل واجبك تاخد حقك وكهذا..احنا جزء من مجتمع له قضاياه وهمومه ...ثقافة وفكر بنورثهم.... مسئوليه تمرير الثقافة من جيل لجيل عادة ما بتقع على الأم ثم الأب..كل ما فصلتها عن مجتمعها ومحيطه كل ما حتبقى بتفصل ولادك عن ماضيهم وحاضرهم...

- وضع المرأة في العالم العربي بيتراجع بشدة...مش التيار الإسلامي بس اللى شايفها "شىء" ....شوف سها بشارة وشوف صورة المرأة اللبنانية فى نظرنا كلنا...ملهمش صلة ببعض خالص...الهوس بالتجميل و الصورة هو برده تعامل مع المرأة على أنها "شىء" ده بيخبيه وده بيتفرج عليه....

- ذاكرة الوطن العربي بتتآكل...الجيل الجديد ميعرفش حاجه عن اسرائيل غير أنها معقل التكنولوجيا وليه منتعاملش معاها اكتر عشان تنتشلنا من اللى احنا فيه؟ التطبيع حصل على فكره على مستويات كتير فى امخاخ أجيال لا يربطها بحاضرها شىء...مش حأجيب سيرة ماضيها..ماضى مين صلى على النبي...

تقولى ايه جاب كل ده جنب بعضه ... اقولك معرفش..