يا سيدي الفاضل أنا عدا عليا العلاج ببول الإبل..و العلاج بنواة البلح..و العلاج ببذر المشمش...و عدا عليا دهشة الخبراء الأجانب وسؤالهم (عندكوا كيماوى اسمه زمزم) ..و اللى عالج أمه بمضادات الأكسدة و اليوجا ...و اللى قضاها تأمل و احضان للشجر عشان يسمع صوت جسمه...و مستشفى فودة في الصين اللى بتعالج بالتبريد... ومستشفى نوالا في المكسيك اللى بتعالج بذبذبات الراديو... وفيتامين ب ١٧.. وفاكهة القشطة في رحلتها للصعود من ٣ كيلو باتنين جنيه للكيلو ب٥٠٠ جنيه وسموها جرافيولا...و اللى لقى تركيبه علاج بميه الأكسجين و يقولك شفت المعادلة مكتوبه قدامى في الهوا وانا بأتمشى في سيدى بشر على البحر...وشفت اللى جوعوا الورم من السكر و اللى جوعوا العيان من الدنيا باللى فيها...و اللى حقنوا الورم ميه سخنه و اللى دهنوا الورم شيح...و شفت اللى شربوا جاز أبيض نقى و اللى عملوا له شق حنجرى عشان يسحبوا ثانى أكسيد الكربون ويضخوا الأكسجين في جسمه..و شفت خلطة أعشاب الدكتور الهاشمى الحائز على جائزة أفضل طبيب في العالم (تقريبا لجنة التحكيم كانت أمه واتنين صاحباتها) و يبيعلك الجرعة عليها جرعتين من طيبة قلبه بس الجرعة ب ٣٠ الف ريال سنة ٢٠٠٨.....و لما كل ده منفعش الدجال اللى شدهم وراه قال نفس مقوله الفنان احمد زكي في هذا المشهد العبقرى لما الحرامى لبس الحجاب اللى حيعمى البوليس عنه و اتقبض عليه في ساعتها وهو يقول "الغبى..لبس الحجاب قبل ما يستحمى" في إشارة أن الفشل معناه عدم اتباع التعليمات مش أن التعليمات بايظه...
هل المفروض كل مريض اسيبه بقى فريسة لكل كلمة رايحه جايه عشان خايف؟ هل لازم يعيد تجارب الآخرين كاملة وهل عنده رفاهية التجريب ؟
الخوف قواد...و الخوف من المرض والفناء بيغيبوا العقل ومحدش كبير على الموقف...
طب اهو على الأقل العلم الحديث واضح..بيقولك نسب الشفاء كذا ونسب الفشل كذا و الآثار الجانبية كذا وكذا...
كل وقت وله دجالينه..وكل وسط اجتماعى وثقافة لها "المعلم سباخ المعالج الروحاني" بتاعها...
هو بس الناس بتستكبر على نفسها الضعف والمرض...رغم أن قبول الضعف والمرض و حتى ألم العلاج كله قدر و المفروض مؤمنين بالقدر خيره وشره...حنعاند سنة ربنا في خلقه و يقولك اضرب شفشق عرقسوس تخف؟!
الطب الحديث القائم على الدليل مش فاشل...انتوا اللي توقعاتكم من الحياة غريبه و عندكم كبر على القضاء و القدر...
2
-2
