باحاول اهرب من التريند والتريندات..بس فى مواقف بتبقى شكلا تريند..مضمونا تعبير عن أفكار سائده وبتعبر عن نفسها من وقت للتانى..

دكتوره طب اسيوط وعليها أحد اساتذه التخدير المرموقين من كام يوم خلال فترة تنسيق دخول الكليات..وغيرها بوستات من دكاترة أساتذة جامعيين مرموقين. ..كلها في اتجاه التقليل من شأن الطبيبات و تحذيرهم من أنهم يدوروا على "ذاتهم" والعياذ بالله...شكلها حاجه عيب الذات دى!

السيد استاذ التخدير كان عامل بوست عن الفرق بين ملوخيه اللى جابت ٦٠٪ و ملوخيه اللى جابت ٩٥٪..وكرررركرركر عشان طبعا اخرتها المطبخ يعنى و تبل شهادتها فيه وتنقعها و دا "آخرها" ..رغم أن المطبخ نشاط إنسانة عادى جدا..ماهو محدش عنده كلوروفيل وبيعيش على التمثيل الضوئي وحيعيش من غير مطبخ! ليه توصله أنه "آخرها"؟ ما عادى جدا انسان يشتغل ويذاكر ويطبخ ...هو اكسكلوسيف اكتفيتى ولا حاجه ؟ بيمضوا على عقد عدم العمل بوظيفه أخرى والتفرغ لو ناويين يعملوا ملوخيه يعنى؟! 

السيده الأستاذة ... مفيش اى معنى انك تبقى فى حفلة تخرج وشباب لسه حيبدؤا حياتهم وتصادرى أحلام وطموحات نصهم عشان هما بنات...اى "مخلوق" مش من حقه يرسم حدود لطموح و احلام "مخلوق" آخر... رأيك الشخصى يا دكتورة يا استاذة جامعية و لكى نشاط نقابى طبقيه على نفسك عشان واضح انك مش مطبقاه..ثانيا..لو حد سألك على جنب اعرضى "تجربتك" فى حدود ونطاق انها "تجربتك" تنفع حد أو متنفعش.. مناسبة لغيرك أو لا...دى ترجع له..ليا زميلات أجلوا شغلهم شويه لحد ما ولادهم يقفوا على رجلهم..ودا حقهم...زميلات كان عندها دعم عائلى و قدرت تمشى كله مع بعض...ربنا يزيدها..زميلات اكتفوا بالحكومة سواء جامعة أو غيره ونزلوا برايفت لما الولاد كبروا شويه..حقهم برده...و ليا معارف اجوازهم اجبروهم حرفيا على تخصصات اكلينيكيه عشان تجيب فلوس أو اتجوزوا ناس طالبين "طبيبات نسا" أو صيدلانيات تحديدا عشان معاه عقد عمل فى السعودية أو عنده صيدليه تحت البيت واهى تشغلها..فى اللى ربنا قسم لها جواز بعد اصلا ما وقفت على رجلها وحققت نفسها زيى أنا شخصيا...هل مسيرة حياتنا كلها نسخة كربون من بعض عشان يبقى رأى واحد هو شخصيا مش ماشى بيه سيف على رقبة الباقيين بشكل مباشر من أهل أو زوج! أو بشكل غير مباشر فى صورة استهزاء و تقليل من شأن الطبيبات أن اكيد طبيخهم وحش وان الاهتمام بالشغل ضد انوثتهم عشان فى الآخر يرضخوا لضغط و يتهدوا ؟

 الفيصل في أى قرار يخص حياة إنسان هو حدود إمكانياته من ناحيه..والظروف المحيطة به من ناحيه اخرى...ليا صديقات لما اخدوا رايى من سنين أنهم حياخدوا إجازة أو يأجلوا دخول امتحانات الدكتوراه مثلا..سألتهم سؤالين وأى واحدة فيهم ممكن تفتكر...حد غصبك؟ راضيه بقرارك "قرااارك" ولا لا؟ دا الفيصل التانى.. مفيش حد من حقه يغضب على حد...ومفيش معنى أن انسان ياخد قرار غير راضى عنه...فى تفهم لظروف وحل لظروف وقتية ..و تفهم وتعاون من شريك الحياة وتقدير متبادل للمسئوليات..لكن هوبا هوبا كرمش طموح دى وارميه من الشباك و لو قالت إنها متضايقه برق لها وقولها انت بنت و ملكيش ذات يا ام ذات ..ولو فتحتى بؤك بكلمة فانتى ملعونة بعدد القبور اللى انفتحت من عهد ادم حتى يومنا هذا...لا دا ارهاب مجتمعى وتدجين و جليطه...

فى النهاية..أنا سعيدة جداً بلقطه تانيه خالص..وهى هجوم الجمهور المحافظ اللى الدكتورة كانت بتغازله بكلامها عليها شخصيا...نظرا. لشعرها المصبوغ اللى "طالع من الطرحه...دا مش منظر قدوة ولا دى قدوة " ..باتفرج على هجومهم عليها وباقول يللا...ربنا مسلط أبدان على أبدان برده..نرجع لمذاكرتنا ياعم ????????????????