و ايه بقى كمان نغمة "متظهريش قوتك يا بنتى عشان الدنيا كلها حترمى عليكى واللى بيدعى قلة الحيلة بيتدلع" وبلا بلا بلا...ايه كمية المصمصه من السيدات والبنات على تحملهم المسؤولية دى واعتبارها نوع من الخيابه لان هذا الكائن رايق مينفعش يبقى متضايق؟
الأصل في الإنسان تحمل المسؤولية..كون فى اختلال ادوار حصل في المجتمع بقاله فترة فدا مش عيب في البنت اللي شايله المسؤولية..دا عيب في المجتمع ونظرته لنا ككل...
اوبشن الحياة ك"لطخ" مطروح للجميع على فكرة..ذكرانا وإناثا...فى رجاله كتير برده اتولدوا لقيوا الحياة بتضحك لهم.. ومفيش اى مبرر للتعب..و سهل أنهم يختاروا الانتخه و يبقوا شخصيات هلاهوطه كدا و الحياة كهلاهوطه مريحه جدا..وان كانت الحياة لن تمنح الاحترام والتقدير لأى هلاهوطه ...و إن كان المجتمع أكثر تسامحا مع انثى الهلاهوطه من ذكر الهلاهوطه..
نيل الاحترام..و القيام بواجب انسانى فى أى مجال..أسرى..مهنى..هو أسمى معانى الإنسانية و جزء لا يتجزأ من استحقاق الإنسان لآدميته ..كون فى ناس مرتاحة فدا عشان توزيع الأرزاق.. كونك شايله فوق طاقتك فدا يحترم وربنا مش بيضيع تعب حد..كون ربنا اداكى عزيمة وشخصية قويه تشيل مسئوليات فدى نعمة..كنتى وكنا حنبقى فى نفس التحديات والمواقف وانتى لايصه والدنيا بتلعب بيكى كورة لو مش بتعرفى تتصرفى ..وأى حد بتعتمدى عليه حيطلب مقابل..الدنيا مش نازل فيها أوفرز فرى..
اجمدى كدا واحمدى ربنا و انزلى الملعب وشيلى معانا ...وشيلى بوستات الهبل دى من دماغك..
2
-2
