كلام مش حيعجب ناس كتير...كتير أوى الحقيقة...

عارف "مغالطة ماكنمارا"؟ 

McNamara fallacy..

مكنمارا دا كان وزير الدفاع الأمريكي خلال حرب فيتنام..كان ماشى بمبدأ تلخيص الإنتصار أو الفشل في الحرب فى وحدة رقميه واحدة يمكن قياسها و التغاضي عن باقى parameters .. يعنى ايه؟ يعنى كان رايح جاى يعد فى جثث العدو الفيتنامى وشايف أن طول ما جثثهم أكتر من جثثنا يبقى تمام واحنا انتصرنا..

مغالطة ماكنمارا مغالطة منطقية بيتم استخدامها كتير جدا فى السياسة..فى التسويق..فى الطب ( لما يروحوا لدراسة عن دواء مثلا و يمسكوا فى endpoint ملهاش لازمه ولا clinical significance و يقولك شوف الدوا بتاعنا ممتاز ازاى)..

   فيلم جولدا بقى..عايش على مغالطة ماكنمارا..رغم اعترافه أنهم واخدين علقه موت.. ومشاهد قىء ديان و كحه واتهزاز جولدا و محايلتها على كيسنجر...بس ماسك فى زيارة جولدا لقوات الثغرة و ازاى كانت دى التحول من الهزيمة للانتصار وان "السادات رقبته فى إيدنا" ..

الفيلم طبعا بيقدم إسرائيل بصفتها دولة غربية مزروعة وسط همج بيضايقوها لله كده... وحروبها هى حروب بقاء عشان البنات الصغننين المرعوبين ميستخبوش فى القبو زى ما جولدا كانت بتستخبى فى قبو بيتها فى أوكرانيا...و دموع الأمهات يا ولاد .دموع الأمهات.. أصل سكرتيرة جولدا ابنها مات فى المزرعة الصينية و كدا وحش وحش أوى.. وجولدا ست طيبه خايفه على الأبناء الطيبين للشعب (جولدا السفاحة زعيمه عصابات الهاجاناه اللى كانوا بيقطعوا الرؤوس ويلعبوا بيها زى الدواعش) ... بس محافظ على لغتها كقتالة قتلا...وهى فى النص بتتكلم وتقولك slaughter them all ...قادرة..وليه قادرة..

للأسف الشديد..قطاع لا يستهان به من المصريين..متبنى وجهه النظر الإسرائيلية دى أكتر من الإسرائيليين نفسهم...تقولهم مصر انتصرت يقولك لا كان في ثغرة... و تربيه أسامة أنور عكاشة بقى و"الصرم" ناحية السادات...و مسلسلات من نوعيه "شارع المواردى" و أحدى البطلات المفروض صحفية رايحه تغطى الحقيقة "عشان لسه فى ثغرة..النصر متمش" ...وعليها أبناء هيكل والناصريين "انتصار السادات فى ثغرة..لكن هزيمة ناصر عليها ستراس..من اللى بيلمع ده" ..كل دى تيارات صفت حساباتها مع السادات ومع مصر كلها فى تبنى وجهه النظر الإسرائيلية عن الثغرة... و الاخوانجيه و احبابهم عشان مينفعش كفار زينا ينتصروا ....

لكن ...معظم من يتبنى وجهه النظر دى ...مرجعهم الأساسى للأسف الشديد هو صاحب الصورة اللى ميعرفوش غيره..سعد الشاذلي...اللى أظن شعبيته وسط الإسلاميين و بعض المعارضين مستمدة من خلافه مع السادات مش من بطولته..لو لم يخالف السادات ونفس الأحداث حصلت مكنش حد درى بيه...

الشاذلي كان عسكرى عبقرى...دا لا شك فيه..رجل شريف ودا برده لا شك فيه..لكن كبرياءه و غروره أكبر من وطنيته ....ناس كتير جدا من معارفنا قابلوه فى مستشفى الجلاء العسكري قبل وفاته..أجمعوا على وصف واحد "چان عسكرى زى أمراء الحرب..مهذب لكن متصلب الرأى..عنده استهزاء شديد بكل من يخالف رأيه وعدم احترام للباقين" ...شايف نفسه يعنى بالمعنى الشائع.. السادات أخطأ في قرار تطوير الهجوم.. حقيقى أخطاء بتحصل...لكن اتهامه بتعمد الخطأ لإجهاض الإنتصار عمدا عشان عميل؟ اتهام جميع القادة الآخرين أنهم مش بيفهموا و إخراج الأسرار العسكرية إلى العلن و توصل لدرجه انك متشوفش تأثير دا على وطنك نفسه بس الأهم تصفية الحسابات ؟ و لما هو السادات خاين وعميل..قبلت ليه مناصب في بريطانيا واسبانيا تحت نظام الخاين؟ مش كنت تقف من أولها وتقول لا؟ ما عبد المنعم واصل برده قال لا مينفعش..وكذا واحد تانى قالوا مينفعش..مطلعوش ليه كلهم ينهشوا فى زمايلهم وفى تاريخ بلدهم؟! 

لو مديت الخط دا لآخره حتلاقى لب المشكلة..هو عايز يطوق القوات الإسرائيلية فى الثغرة ويصفيها ويسحب جزء من القوات المصرية على الضفة الشرقية للقناة و يتعامل بيها...

طب عسكريا صح..انت صح..طب الناس اللى لو قلت لها ترجع دى حتنهار و تفقد الثقة في القيادة تماما؟ أرجع لمذكرات الصحفى الراحل "جلال عامر" خلال فترة خدمته ..و أحد الضباط بتتكلم عن احتمالية الرجوع وسمعه أحد المجندين..ودخل المجند قال "رجوع فين! محدش راجع يا ولاد الكلب" ..ناس كتير كانوا مقررين أن لو طلع لعب بيهم زيهم ٦٧ حينفذوا عمليات انتحارية ومش راجعين .. مفيش حد كان عنده استعداد يرجع ولا يواجه أهله ... متخيل حجم تفكك القوات؟ 

طب الثغرة ؟ الكيلو ١٠١..حيحتلوا القاهرة!!!

مش واسعه شويه ؟ قاهرة ايه هما عرفوا يدخلوا السويس وهى شبه فاضيه ؟ انت متخيل أنهم كانوا حينزلوا بدباياتهم يتمشوا فى الشوارع لحد كوبرى القبة مثلا؟ هى شبيحه عين شمس قصرت معاكم فى حاجه ؟ انت بتتكلم في مدينة كثافتها السكانية مروعة ومعنوياتها عالية و سكانها عقائديين لما تعمل فيهم ايه مش حيسلموا..سلاح الجو مشلول و المدرعات و المدفعية عطلان...ايه حيحتلوا القاهرة بالمشاة المكسحين بتوعهم؟ دول معرفوش يقفوا على رجلهم فى معارك تطهير القنطرة يا مؤمن...يحتلوا قاهرة مين؟ القاهرة بتاعتنا؟ 

نيجى بقى للوضع الأكثر صعوبة...السلاح السوفيتي قصاد السلاح الأمريكى... وتصفية الثغرة يعنى إبادة ما يقرب من ثلث الجيش الإسرائيلي...هى أمريكا كانت حتسكت؟ نركز يا جماعه ونفكر..

و فى النهاية..اديك شايف بعينك..دى ناس ممكن تسيب شبر أرض بسلام من غير ما حد يكسر مناخيرها؟ دى ناس بتشن حروب إبادة كأنها بتقلى بطاطس... سفاحين لا دين بيوقف ولا أخلاق بتفرمل ولا مجتمع دولى يقولهم وقفوا..دى ناس لا يمكن تدخل سلام وتسيب أرض غير وهما مرغمين ومكسورين كمان...

آه انتصرنا ومشينا الأمور على مزاجنا فى حدود قدراتنا وحدود الموقف الدولى ما سمح....

قرار صح عسكريا وغلط على كل المستويات الأخرى..زيه زى مذكراته اللى أفشى فيها أسرار عسكرية من ناحية ووزع اتهامات على كل من حوله من ناحية أخرى...

ربنا يسامحه على ما فعله بأجيال ...بتتبنى وجهه نظر تدعمها بروباجندا عندها مشاكل مع السلطة و متلخبطه بين مصر وبين السلطة..فبتصفى مشاكلها مع تاريخ بلد بحالها...وإذا كان احنا ربنا أراد وسمعنا من شهود العيان...بعدنا مش حيسمعوا من حد ومش حيفضل غير مذكرات الشاذلى ذو السمعة الهائلة والطله الأنيقة فى الصور.....

وربنا يسامحه..وألف عتب عليه....