دوائر لا تنتهي

- على جنب حتلاقى ناس بتنعى العروبة و تنعى الزعامة وتنعى رابطه أطباء العيون السابقين...دول عندهم قناعة أن الشعوب العربية "متجيش إلا كده" و حيعتبروا بشابيشو بطل ويحطوا صورته جنب صورة صدام حسين في تمثل واستدعاء لكل صور الذكورية السامة "و يقولك كانوا رجاله موحدين بلادهم.... عشان ضربوا شعبهم بالكيماوى ومحدش قدر يقول بم" ....طبطب عليهم وحطهم جنب الحيط..

- على جنب تانى حتلاقى شلة من المطاريد و اللى بيحبوهم سقوط نظام الأسد و سقوط سوريا في أيد اصحابهم دغدغ أحلامهم جامد "دغدغ اللى هى زغزغ مش حطم" ...دول شايفين نفسهم مكان الجولانى و ماشيين يطحنوا فى اى حد يقول أنا قلقان أو على الأقل مش فرحان ومتفائل ومبسوط و بيعيبوا على أى حد يقول كلمة غيرهم وبيتريقوا عليه عشان بيحلل الأمور...سيبناكوا تحللوا انتوا براحتكم.. حاضر..

- على يمينك حتلاقى ناس موجوعة كتير وعندها حكايات ومآسى عن نظام الأسد...يحتفلوا حقهم....احنا بنتكلم عن دكتاتور سيكوباتى منفصل عن الواقع و مجرم بدم بارد وملوش رابط...سيبهم يحتفلوا حتى لو بدون تفكير..

- على شمالك حتلاقى ناس بتفكر في محور الممانعة و قطع الامتدادات عن حزب الله و غ*ز*ة ... الأسد مكنش بطل لا سمح الله...و التوقيت مريب جدا و التحركات التركية اغرب و يديلك إحساس متنح كده أن مين بيضرب في مين ومين بيودى على فين! هو في ايه يا جماعه!

مخضوضين وحقهم.... على كل أصبح عند المجاهدين حدود مع الزهاينه اهوه..أما نشوف...

- تعالى بقى جنبى على هذة الدكة..دكة سكان المنطقة منذ ٤ عقود ونيف..حتلاقينا شفنا أفلام كتير زى دى.. بنفس البدايات و نفس المآلات ...افغانى وعراقى و ليبى ... بالنسبه لنا صدام وبشار و الجذافى ما هم إلا حثالة الديكتاتورية قتلها محتلين وإرهابيين...نهايات تليق بهم نسبيا ولا يمكن تمجيدها "ولا حتى صدام...كون الامريكان أعدموه دا مش حيعمل منه بطل) ...وحشيتهم أفرزت معارضينهم بنفس الانحطاط والوحشيه و معاها تدخلات من كل القوى الإقليمية والدولية التي أثبت الزمن انها مش بتستر...بترميك للغوله اول ما تاخد غرضها منك.. 

لكن الناس العاديين زينا هما اللي يوجعوا...اللى طالع من سجون الأسد بيفضى مكان للى داخل سجون الجولاني..اللى كمان عقد أو اتنين ناس تانيه حتحاول تطلعهم برده..دوائر مش بتخلص...

اللى زيى بيقول يارب ولى الأرفق والأرحم بالبلاد والعباد.. يارب احنا نزفنا كتير اوى...الألم والفقد والرعب والدموع في بلادنا بقت اكبر من الاحتمال... يارب طلع الناس على خير واحقن الدم و ارفع الظلم و الجور عننا.. يارب أرحم عجائز وأطفال و ملايين من البشر اللى مش عايزين اكتر من حياة عادية جدا.. بسيطة جدا...