مش عايزه أحرق لكم ل plot twist فى اخر الفيلم...بس بعد ما الكوفيد-١٩ ينحسر و يبقى مرض عادى زى السارس مثلا كدا ( ودا متوقع خلال سنتين بدون تدخل بشرى...او اقل اذا ربنا أذن ولقيوا علاج جذرى أو مصل) ..حيرجع الكوكب يتخانق مع بعضه على البترول والموارد و الاقتصاد و حاملات الطائرات والغواصات..بالعكس أهميتها حتزيد جدا عشان فى ضوء نقص الموارد وتعثر الاقتصاد كل واحد حيحاول يهبش اللى يقدر عليه من جيرانه فالاوبشن حيبقى يا تعيش ديناصور يا تموت نملة... و العلم حيشتغل اه شويه فى الأمراض المعدية والفيروسات ( عشان اكتشف انها ممكن تضرب العالم الأول و تبهدله مش بتاعه الفقراء الجربانين اللى لو ماتوا مصلحة) وبعدين يرجع يشوف ايه يبيع ويجيب فلوس تانى برده...و كام سنة وحننسى و عقدين تلاته و حيرجع بتوع الانتيفاكس و المؤامرات الكونية والأرض مسطحة...

و هنا يحضرنى المقولة الخالدة ( هو انا كنت كلت ايه لما حأشرب عليه!) فى إشارة لأن اعقل توقعاتك بناء على خبراتك السابقة يعنى..فمحدش اتعظ زمان ولا حيتعظ دلوقتى و لا حيتعظ بعدين ..

و الكورونا حترجع شكولاته و لو قلت لسياسيين بلاش عك عشان البيئة حيقولك مزعلاك فى ايه؟ هى بنت خالتك ولا حاجه!!!!