لاأخفى ولا يخفى على أحد انى بأكره تعبير "الشغف" دا جدا..بأحسه بيتكلم عن فورة حماس وهيبره وقتية ممكن تحرك شىء ما وتبدأه لكنها غير قادرة على الحفاظ عليه..وبمجرد فقد الحالة الهستيريه دى الواحد يقعد يولول ويقولك "انا فقدت شغفى" رغم انه ممكن يكون ماشى فى الطريق الصح عادى بس قابل العقبات المتوقعه فى مسيرة تعليم او عمل اى حد...وتقفل فى كثير من الأحيان على انسان واقف بيرقص على السلم..مش عارف يكمل اللى بدأه ولا عارف يتحرك فى اتجاه جديد ويقولك "أصلى فقدت شغفى"...

حأحاول انى مبقاش عاطفية وانا باتكلم عن CJC ..ابنى اللى بيكمل 10 سنين ..ابنى حقيقى..من أول ما الفكرة اتطرحت اصلا مع الأخ الأكبر د.عمرو شفيق..ومع الأخ العزيز خالد عبد العزيز سنه 2012 واحنا بنشتغل فى المركز الطبى العالمى.."احنا بنكون جروب educational" وحنعمل قعدة نتناقش فيها..تحبى تبقى معانا؟" ..الاجابة أظن معروفة..

عشر سنين من الحفر فى البحر أحيانا..نجاحات جميلة جدا واخفاقات برده..مراجعه طريقه الشغل كلها لو لقينا الfeedback مش بالمستوى المطلوب..دايرة الأصدقاء وهى بتوسع وتكبر وواحد ورا التانى بينضم للجروب بأفكار جديدة واقتراحات جديدة...عيله CJC الفريدة جدا من نوعها..وهما فعلا عيله..اقرب ناس ليك هما اللى بتشاركم الأحلام غير المنطقية من غير ما تخاف يقولوا عليك اتجننت ???? لا دول بيقعدوا معاك يخططوا لتنفيذ هذة الأحلام كمان..

عشر سنين من رحلة تعلم طويلة..كسر حاجز الحديث أمام الجموع..التعود على العمل تحت يافطه كبيرة والتخلى عن "الأنا" ..النجاح نجاحنا كلنا...وكل خطوة واحد فينا بيمشيها بتزق الباقى معاه قدام ..والكيان يكبر ويقف على رجله...

انا سعيدة جدا لأن ربنا قسم لى أكون جزء من رحلة CJC ..ساعات بأفكر لو لم اتواجد بالصدفه فى مكان ما فى وقت ما..مكنتش حأبقى جزء من دا كله!! انا ممتنه وبأشكر ربنا حقيقى على انه وفق اللحظة والمكان والأشخاص ..و اتمنى انه يديم فضله ونعمته وخيره علينا ويفضل CJC يكبر ونحتفل بمرور 30 سنه على تأسيسه ..اتمنى اليوم دا ييجى...