بروميثيوس عملاق تيتان مساعد زيوس

النهارده فى كومنت ل Heba Mohamed صديقة البرنامج..قالت ان الحياة من غير علم مرعبة..مرعبة اوى ومن غيره احنا بنتخبط..و من ساعتها وانا بأفكر فى بروميثيوس ..جالب النار..وبطل قصيدة ابى القاسم الشابى الشهيرة جدا (نشيد الجبار) اللى بيقول فيها على لسان بروميثيوس: 

(النّور في قلبِي وبينَ جوانحي فَعَلامَ أخشى السَّيرَ في الظلماء)

بص يا سيدى، بروميثيوس كان عملاق titan وساعد زيوس فى الحرب بين آلهه الأولمب والعمالقة وعلى راسهم ابو بروميثيوس نفسه. .بعد ما زيوس تمكن من حكم العالم ونصب نفسه كبير للآلهه بدأ الخلاف بينه وبين حليفه (بروميثيوس)..بروميثيوس كان شايف ان معاملة زيوس مع البشر غير عادلة ، وبدأ يطالب بمزيد من الحقوق للبنى آدمين زى أكل اللحم و الحياة فى النور بدل الظلام الدائم ...لحد فى يوم ما بروميثيوس سرق النار فى شعلة من جبل الأولمب ونزل منه جرى و أهداها للجنس البشرى (فى تقليد ما زال متبع حتى الآن فى افتتاح الدورات الأولمبية..لما عداء بيجرى بشعله وتفضل تتنقل من عداء للتانى لحد ما آخر واحد فيهم يوصل للشعلة الأولمبية ...دا اعادة تمثيل لرحلة بروميثيوس وهو سارق النار وبيهبها لنا)...

بروميثيوس لما جاب النار جاب معاها النور...العلم...الطب...الحكمة ..كلها هبات بروميثيوس محب البشر..(اسم Prometheus نفسه مكون من مقطعين..معناها المفكر الأول..او من يفكر قبل الفعل..)..وتحول البشر لكائنات قوية مما أزعج زيوس بشدة..فقرر يعاقب بروميثيوس عقاب وحشى..انه يربطه فى صخرة و كل يوم مع طلوع الشمس فى طائر جارح ياكل كبد بروميثيوس كل يوم..فى الليل كبد بروميثيوس ينمو تانى و العقاب يتجدد وهكذا وهكذا..لحد ما ييجى (هرقل) ابن زيوس المحب للبشر ايضا ويحرر بروميثيوس ..زيوس يسكت؟ لا طبعا..أمر اخوه صانع الأسلحة (هيفاستس) بخلق أجمل امرأة فى الوجود (باندورا) و بعتها الأرض ومعاها جرة مغلقة..الست باندورا حبها مين؟ ابيميثيوس اخو بروميثيوس..بس كان مخه خفيف حبتين فضحكت عليه..و قبل وجودها على الأرض وسمح لها بالتواجد فيها...أول ما باندورا وصلت الأرض فتحت الجرة وخرجت منها كل الشرور..الأمراض ..الأوبئة...المآسى (بنظام مش انتوا سرقتوا النار و الطب والحكمة..ورونى حتعملوا بيها ايه)..

العلم نور..فعلا نور..العلم هبة ومنحه من الله للبشر..من غيرها احنا حيوانات بدائيه بتتخبط فى الضلمة واى دجال ممكن يعيشنا تحت رحمته..العلم جميل..مرتب فى عز الفوضى..وفوضاه اكثر ترتيبا من اى وضع غير علمى..آلياته بتفكيره بجداله بأسألته..شكه ويقينه..كل حاجه فى العلم جميلة والحضور البشرى فيها بيكون فى أقصى حالاته سموا..وأقرب حالاته لخالقه ...عشان كدا اى استهزاء بالعلم او تعدى على آلياته او ترويج للعلم المزيف مش مجرد كلمتين وخلاص..دى اهانه لكل ما هو بشرى واستهزاء بالإرث الطويل للعقل..تخلى طوعى عن أكبر نعم الله علينا..

محدش يرمى اكتر حاجه بتنور طريقه من ايده تحت دعوى انه خايف..احترموه يا جماعة واستنوا عليه شويه وحيحل مشاكلكم ان شاء الله..