بمناسبة الكلام عن الماضي الإستعمارى لبريطانيا...وهل المفروض يشكل علاقتنا بيها زى ما صراعنا مع إسرا*ئيل بيحكم علاقتنا بيها...

من حوالى سنتين كنت في لندن و اتعرفت هناك على صيدلانيه بتعمل فى NHS و بتكتب مراجعات القيمة الاقتصادية للأدوية...بنت لطيفه جدا و الحوار كان جميل وحكت لى ازاى بتكون حريصة هى وفريق العمل على كتابه التوصيات بأكتر صيغة مفهومه عشان باقى العالم يستخدمها كمرجع ...فى وسط الكلام قالت لى أن جدها كان مهندس فى مصر زمان وورتنى جواب شكر من الخديوى عباس حلمى لابو جدها على إقامته مشاريع رى فى السودان ..قالت دا ووشها فى الأرض...وبعدها "أنا آسفة انى بأقول دا ..مش شىء يدعو للفخر... عارفه انهم كانوا بالنسبة لكم محتلين و أن المشاريع دى استغلوا فيها أهل بلادكم كعبيد...لا شىء يدعو للفخر"...

أنا تقبلت كلامها ...وشها كان مكسوف وفى الأرض ونبرة صوتها صادقة جدا وهى بتعتذر..."دا كان من الماضى...وانا متفهمة دا وانك ملكيش ذنب"..وشها ارتاح ساعتها وكملنا كلام و استمرت صداقتنا بعدها حتى الآن...

الفكرة..هل تم التخلى عن الأيديولوجية الاستعمارية بكل توابعها من تنظير. واستعلاء على الآخرين ؟ هل بيتم التفاخر بيه؟ 

فى حالة بريطانيا.. الماضي الإستعمارى بيسبب الحرج لكثير من الناس...اينعم مفيش اعتذار لا سرى ولا معلن عن الإستعمار...لكنه معادش جزء من استراتيجية بريطانيا...فى صراعات عنيفة على مناطق النفوذ طبعا و شغل استخبارات وبلا بلا بلا...لكنه مش جزء من استراتيجية البلد ولا ايديولوجيتها...على عكس إسرا*ئيل...العداء ناحيتنا هناك built-in ..

الاستفزاز بالنسبة لى فعلا مش من الترحم على ملكة بريطانيا ولا طبعا من كلمتين زى "ارقدى فى سلام يا كوين" .. الاستفزاز بييجى من حاجتين..التنظير علينا كشعوب همجية ياكى قصاد الغرب المتحضر"ابو مذابح نابالم و ضرب بيوت مدنيين أثناء العدوان الثلاثي" ..و النوستالجيا العجيبة للماضى الإستعمارى من بعض المصريين"وسمعتها بودانى ...مش كنا سبناهم كان زمان العيال كلها بتتكلم انجليزي نضيف وكانوا نضفوا البلد" .. تقريبا فاكرين أنهم تحت الإستعمار البريطانى كان حينصب ايرل وستمنستر باين...نسيوا نفسهم ولاد الفلاحين ...

احنا نفتكر اه..عشان نفضل فاهمين قيمة الأرض اللى احنا واقفين عليها...و نفضل نفتكر أهلنا بكل احترام...لكن تشكيل العداوات واجترارها بناء على ماضى...بيتوقف على كون الماضي دا جزء من تكوين عقلية وايديولوجيه حالية ولا بح خلاص..