بالمنطق .. بالأمن القومي نتحدث

هو انا لو مقلتش رأيى..حيقولوا اللى مقالتش رأيها أهيه!!!

على كل:

- من حق كل الناس تعبر عن تضامنها بكل ما تملك...و من حق كل دولة تحديد من تريد استقباله و كيفية ٱدارة الأمور على أراضيها أو أى حاجه طالعه من أراضيها ...و من حق كل الناس تسأل وتتساءل عن كيفية التعامل مع السيناريوهات المحتملة كلها بدون تخوين أو تسطيح أو إتهامات (ديموكراتيه جدا) بقصر النظر أو الجبن والانبطاح...أو الرضا بما يحدث..

- من حق كل الناس تتضامن بس بدون تحميل التضامن رسائل وعداوات أخرى...راجع فيديوهات حزق الصحفيين الأتراك في المطار و انت حتفهم...ما بلاش ينعى ولده ويصلح ساعات ويتضامن و يعلم على نظام فلان..ما كفايه بقى أرف بقى..

- شويه ذكاء في إدارة الأمور (و الحقوق) بيخلوا الصورة تطلع حلوة... 

- لما تبقى داخل منطقة خارجه من حرب طاحنه لسه من كام سنه..حرب كان فيها كمائن بتتفجر و قرى بتتفخخ و دم للركب ... طبيعي جدا تتفتش و يتدقق ...هو انت شلت معانا أشلاء شهداء ولا مصابين في حرب طويلة ؟ ما دمت مشلتش متتكلمش...نفتش ونتفتش واحنا داخلين عشان اللي حصل ميتكررش تانى..

- سيادة اللواء اللى شدد على دخول الدرونز و أجزائها و مكوناتها... ربنا يكرمك يا سباق يا ابو نظرة مستقبلية..

- سيادة اللواء برده اللى كان بيكلمنا زمان في محاضرة أمن حربى وقالنا موبايلك اللى فى جيبك ده عدوك وأنه بيقنع أولاده بده واحنا جيل فلتان ...وانك مكشوف ومفيش حاجه اسمها الموبايل فاصل شحن ولا مش مشغله...احنا اسفين يا باشا انى بينى وبين نفسي قلت ايه الأوووفر ده..انت صح بس معرفش حلها ايه...

- ما غيروا اسم الاسلامبولى اهوه... عشان هما بقالهم فترة (عدو) بس التانيين اسمهم (العدو) بشكل مطلق كده غير محدود بزمان ولا مكان...حاله (عدو) ممكن تتغير..لكن حالة (العدو) لا يمكن تتغير...

- لو بتتكلم بمنطلق قومى ... احسن احسن..اى حد يحدفهم بأى حاجه فعليا انا معاه...أى حد يلوي دراعهم ويلهيهم و يستهلكهم دا حبيبي حبيبي حبيبي..اهو على الأقل بيأخر الدور اللى جاى عليا شويه وبيورينى طريقه تفكيرهم عشان آخد بالى واحتياطاتى....كون اللى بيحدفهم ابن #$'&$#@ دى نبقى نتفاوض عليها بعدين..

- لو بتتكلم بقى بمنطلق عقائدى ...و خناقه بين رموز تاريخية ودينية... اقولك طب يعني تخيل معايا لو الرموز الدينية دى موجوده حاليا وشافوا الوضع...حيسيبوا خناقتهم سوا و يمسكوا في خناق (العدو) بعدها بقى نبقى نشوف حنعمل ايه سوا....

- اللى لسه بيتخانق في دماغه على أحداث من ١٤٠٠ سنه تقريبا...لا يوجد تعليق أقوى من الصورة أدناه.. عايز الخلافة ؟ روح خدها...أصحى يا ابنى احنا في داهيه..مش رايحين..لا احنا وصلنا خلاص...

- السادة بقى اللى هاريينا نقار وشجار وتضامن ودبدبه وحيموتوا وندخل الحرب (اللى احنا دخلناها أصلا بشكل غير مباشر والمباشر جاى في السكه) ..لما ندخل بجد عايزه اشوف وشوشكم...حتبقوا شوكة في الضهر و حتفرحوا بكل خبطه ناخدها (ودى حرب وارد جدا تاخد خبطات وشديدة كمان المهم مين يوصل للآخر واقف على رجله) عشان الخبطه حتبقى دليل على صحة موقفكم من النظام ؟ حتتبنوا موقف نتنزفت وهو بيقول بيان الأسد الصاعد ؟ ولا حتفهموا أن دى حرب وجود و حتعرفوا يعنى ايه صف واحد ومهما الخصومة كبرت لها سقف وحدود؟ 

عارفه الإجابة عن ناس كتير بس مش عايزه أصدقها..