ايران .. محاولة فك التشابك

دعنا نقوم بعملية disentanglement ..أى فك تشابك سريع وواضح.. معلش في ناس بتحب المواقف الأحادية لا اظن أنهم سيجدوا أنفسهم هنا:

١) إيران بيحكمها نظام ما..مختل و مستنى يملك الأرض عشان الأمام بتاعه يظهر...عاش على تصدير الثورة و النسخه الخاصه بيه من التشيع و سمى شارع بإسم من اغتال السادات..

 دى حقائق..

تفتكر ترومبه قرر يسقطه عشان يعنى هو كنيته "ابو حنان" فهو ابو حنان بجد يعني ودا جزء من حنانه الفايض؟  

حاعتبرك جديد معانا في الكوكب..واشرحلك أن لا..دا قرار عدوان اهوج غير مدروس من شخص مختل سكران بالقوة العسكرية و بيحركه شويه مختلين هربانين من Assassin's Creed ... و هما كمان جايين يحققوا نبوءات توراتيه و مستننين هرمجدون و قرون وسطى هابشه دماغهم...

خطورة الانسياق ورا تشجيع ضربات من هذا النوع هو الإقرار بأن من يملك القوة من حقه يغير اى نظام مش عاجبه أو مش عاجب بنت أخته كده وخلاص... ما يسرى عليهم يسرى علينا.. تخيل لو مثلا أبو حنان كان قفش لما السيسي مرضيش يقابله من كام شهر و قرر يطلع ملفات حقوق الإنسان من الدرج و ينبش في الماضي و يسقط النظام ؟ هو نفس السيناريو على فكره وبيخدم نفس المصالح ونفس الأشخاص الاعتباريين ...

من بابه كدا...دا اعتداء فاشى وغاشم واحمق متجاوز قولا واحدا غير قابل للتفاوض .... 

٢) طريقه ونوعية وأسلوب العدوان... المتعارف عليه من زمان أن الهدف من الحرب الوصول لهدف ما ...هنا الهدف كسر وتركيع و أضعاف على المدى الطويل..وإفقار و قتل مستقبل شعب بحاله.. نفس تكنيك الإبادة في العراق (اضرب البنية التحتية ودعهم يموتون في أحضان أمهاتهم بعيدا عن الكاميرا) مخلوط بتكتيك الإبادة في غزة (اضرب واقتل وصور وأعلن و كون صورة وحشية في الذاكرة الجمعية للبشر ...كون وحش مخيف كبير عشان تضمن خضوع الباقين لأجيال قدام ... تكلفة رفع الرأس يجب أن تكون قطعها.. ويجب أن يعلموا أن عدوانك ليس له سقف ولا حدود..تروما عابرة للأجيال يعنى) ...

دا مش تغيير نظام..دا محو حضارة و إعادة للقرون الوسطى كعقاب على شىء ما...

٣) إيران ماشيه على خطى عدوها القديم صدام حسين..أيام حرب الخليج الثانية (تحرير الكويت) كان ماشى بنفس التكنيك...اضرب الدول العربية و أرمى شويه صواريخ على اسرازفت لضمان التصفيق الشعبي...خلى الناس متبرجله شايفاك معتدى وبطل في نفس الوقت..ودا حصل بامتياز...و كفاءة الضربات محلياها في عينينا كلنا..

ك نهى...و انت بتضرب هناك حأسقف و أقولك "لله دركم آل فرس..أقبلوا قوم كسرى أقبلوا" ..تضرب عرب حأقولك "خسئتم آل فرس ...شلت أيديكم قوم كسرى" ..

اسقاط طائرات و حاملات طائرات و صفارات الإنذار في تل الربيع بيكسر مناخير وهيمنه ووهم من مصلحة الكل أنه يتكسر..لازم حد يعملها ... لازم تكلفة العدوان تبقى كبيرة حتى لو لم يتم دحره بالكامل..لازم يتوجع بشدة عشان هو كمان يعرف أن فيه عواقب خطيرة لأفعاله..وان ولاده حيدفعوا التمن..

٤) بمناسبة الولاد... الأجيال القادمة مش حتعرف تشوف استقرار ولا أمن ...لا عندنا ولا عندهم...دول خلقوا ثأر و دم حيبهدل أجيال ..جماعات ألعن من القاعدة و ذئاب منفردة وفي جماعات.. العالم مش حيشوف استقرار لجيلين على الأقل..

٥) الإخوة الخلايجه..قلبى عندكم ومش عندكم...انتوا راهنتوا كل الرهانات الغلط...اخترتوا الحصان اللى كله قال إنه بيوقع اللى يركبه ويدهسه..تخيلتوا انكم لو دفعتوا اكتر شويه يحميكم ..

محدش بيحمى بلد غير أهلها..ولا احنا حنحميكم على فكره..احنا دافعين تمن عيشتنا جوه حدودنا دم... و اقتصاد حرب بقاله خمسين سنة...مش حندفع دم ولادنا لحد...احنا نساعدكم تبقوا زينا..خبرات..دعم..تدريب.. لكن محدش حيداقع عن بلد تانيه.. معندناش فائض قوة ولو عندنا مش حنوديه في حته...

لكن..قلبى عندكم وانتوا واقعين في النص بين التوراتى والإثنى عشرى..و بيتضرب مستقبلكم واقتصادكم و حياتكم ...كوارث بيئية و شبح حرب نووية فوق الرؤوس...

لما ربنا يعينكم وتطلعوا منها نبقى نتكلم.. ربنا يحميكم..

٦) تفتكر لو أبو حنان انهزم و ايران ركبت حيبقى تمام ؟ يا نهار اسود..اسود من عمة الملالى.. الخليج (اللى طلع محق فى مخاوفه من إيران) حيحتل ويتمسح ... تفتكر لو إيران مدفعتش ابو حنان و بنت أخته تمن العدوان حأتبسط؟ لا طبعا لازم يدفعوا التمن ويطلع من نافوخهم..

 العاركه دى مش بتاعتنا...بس احنا مهروسين في النص.. يدخل تحت نطاق المهروسين الشعب الإيراني نفسه ...و لبنان اللى ليتحول لغزة جديدة بس محدش شايف ..

٧) جدنا الكبير.. الكبير اوى..اللى شاف نهر النيل و قرر أنه يبنى بيته هنا من الطوب اللبن..وقال لمراته ( انا لقيت لك مكان نعيش فيه مفيش زيه في الدنيا) ..

والله يا جدو مش عارفه اقولك ايه..هو انت عندك حق طبعا..بس كنت اختار الجار قبل الدار..اينعم مكنش الجيران دول ظهروا ..بس انا بأدفع تمن اختياراتك يا جدو..اخترت الموقع ومخترتش الجيران و احفادك لبسوا...

٨) ربنا يطفىء نار الحرب بسرعه... ربنا ينجى عباده و يحفظ بلادنا جميعا... و ياخد كل المعتدين أخذ عزيز مقتدر يا رب..

وكل سنه وانتوا طيبين..