إمبراطور كل الأمراض..السرطان...سيرة ذاتية

النهارده حنتكلم عن الكتاب اللى بيتكلم عنه..

إمبراطور كل الأمراض..السرطان...سيرة ذاتية

 The emperor of all maladies..A biography of Cancer.

 أولا و بإعتراف شخصى..انا بأكره السرطان و أفعاله لدرجه أنى ساعات باتكلم عنه كشخص...و احيانا لما بألاقى اشعات مريض تطورت بشكل سىء بأحس أنه واقف فى غرفة الكشف معايا و بيضحك باستهزاء ..لما الكاتب هنا وهو طبيب ايضا وصف الكتاب بالسيرة الذاتية فهمت أنى مش لوحدى...بشكل ما معظمنا عنده نفس الإحساس..اللى بعد عمل حوالى 14 سنة فى المجال دا بيزيد يوم بعد يوم.

 سيرة ذاتية للإمبراطور...من اول برديات ايمحوتب لما وصفته و عرفت أنه نوع من الامراض خارج عن المألوف..اليونان ووصفهم له رغم عدم فهمهم لآليه نموه..الملكة الفارسية أتوسا و عملية استئصال ورم بالثدى قام بها أحد العبيد لحمايتها من المرض اللى عارفينه بس مش عارفين يوصفوه

 No one, even under torture, can tell what cancer is!

 الوصف الأول ..التعرف الأول...جزء من الكتاب بيتكلم عن تأثير الثقافة العامة على المرض..لما فى اول القرن العشرين مجموعة سيدات طالبوا بعمل حملات توعية عن سرطان الثدى فى امريكا و قوبل طلبهم بالرفض لان ( كلمة ثدى هى كلمة غير لائقة.. بالإضافة أنه كلام سوداوى يؤدى للذعر العام)..

 و برده..النور اللى بدأ يظهر ...اول مريض اتعالج من اللوكيميا..اول مريض يشفى تماما من سرطان الخصية بفضل عقار البلاتينول ( اللى كان ساعتها أجمد و أشيك حاجة فى السوق..دنيا!).. تطور التخدير و الفهم الجديد لآليات العمل و التطور...قفزات المعرفة الإنسانية فى العلوم المختلفة زى الفيزياء و علوم الذرة و البصريات..فهم الخلية و بصمات واطسون و كريك على البيولوجى..و ازاى فى النهاية كل دا صب فى اتجاه فهمنا الأعمق للسرطان و تطوير علاجاته....

 الطريق طويل..و لو بصينا ورانا حتلاقى اللى اتمشى مش قليل..من اول الوعى لحد العلاج..بس كل ما بتعرف أكتر لندرك اننا قدامنا كتير..لسه كتير...لو فى حقيقة واضحة فهى اننا كنا سذج و أن الأمور أعقد مما نتصور...لكن الناس الى قافله على نفسها المعامل عشان اهلك يفضلوا حواليك أطول فترة ممكنة مش بيعرفوا اليأس...العلم جميل ورومانسى كمان...

 و تيجى تقولى طالب ثانوى لقى علاج السرطان مكتوب على ورق الجوافة!!!!!!

#WorldCancerDay #

Re-post