المتحف ليس نيش والدتك..

يا سيدي الفاضل..

السياحة صناعة..و الصناعة محتاجه ادوات تصنيع وإنتاج...

اى حد اتعامل مع عاملين في السياحة الثقافية (سكان الأقصر مثلا) حيلاقيهم زعلانين أن مصر بقالها فتره غير جاذبة للسائح المثقف الكلاسى ...وهو شخص ثرى عنده استعداد يدفع عشان يشوف آثار ومعابد حضارة و يعيط قصاد رسوم جداريه..

هذا السائح عادة بيصرف كويس و جاى للمكان ده بقيمته...

دا يختلف تماما عن السائح الفانكى أو سائح الشواطئ..

جاى بميزانية مختلفة و عايز فطار و غدا وعشا بأرخص سعر..و هذا النوع من السياحة له منافسين كتير جدا...أى تركى مدخن يقدر ينافسك فيه...

يبقى الطبيعي انك تركز على المنتج المميز المختلف اللى مفيش زيه لا عند تركى مدخن ولا مسلوق....

و الفائدة مش بتبقى في مصاريف المتحف ده بس...

مدينه زى الأقصر دخل الناس كلها حتى بياعين الخضار في الشارع متوقف على السائح ...بييجى يأكل ويشرب ويتصور ويطلب مترجمين ومرشدين وحناطير و كل ده رزق ودخل ....

بالتالى الكلام عن ضياع الفلوس و انتوا بتحتفلوا بإيه والمعايرة والتنكيد على الناس بدعوى "جعانين وبتحتفلوا" هى في احسن الاحوال عدم فهم لجوانب كتير...

و لا يا سيدي...المتحف مش الهدف منه لم "التحف" وخلاص..

المتحف ليس نيش والدتك..