وانا بأرتب مكتبة بيت ماما...اكتشفت أن ماما مش بس قدمت لنا تعليم موازى للتعليم الحكومى..ماما قدمت لنا "المعرفة" ودى مختلفة تماما عن "التعليم" ...

على اد ما التعليم مهم عشان يدى الإنسان ادوات للتعامل مع الحياة..على اد ما هو فى بلدنا بيمسح الإنسان ويشكله فى قالب موحد..بيطلعه عايش عمره كله على "نموذج اجابه" واحد موحد لا يمكن يقبل بغيره ...كل ما عداه غلط.. 

"المعرفة" حاجه تانيه... المعرفة لها ادوات بتساعدك تفهم وتتفهم عدة إجابات لسؤال واحد..و كلها تتراوح بين الصح والمقبول و الممكن...و كلها عرضه للنقد وانت تختار بينها... المعرفة بتخليك متاخدش حاجات كتير على قلبك..إلا نقض ادوات المعرفة فى ذاتها ...

ماما لما كنت أقولها قريت كذا في الكتاب الفلانى ومش عاجبنى..كانت تقولى اقري كتاب تانى فى نفس الموضوع وجايز ترشحلى كاتب معين ...علمتنى أن المعرفة عمليه ديناميك جدا..و انى اتقبل آراء عادى...

بيتنا فيه إصدارات كاملة لكتاب كبار و أدب عالمى و مبادئ فلسفة..وكل دا بفضل السيدة الجميلة الذكية اللى ربنا أهداها ليا كأم...

ربنا يرحمك ويغفر لك...انتى حاضرة معايا في كل حرف باقراه وكل حرف بأكتبه وكل فكرة تعدى على مخى..كل دا مجهودك وتعبك انتى...