الحياة طب و اشياء اخرى

الحقيقة صعب عليا عاطف ...من قبل ما يروح طرشوخ الليف..الولد اتجبر على حلم مش بتاعه ..و دى قصة بائسة أكتر من طرشوخ الليف..

ومن هنا اتذكر انى عملت عمليه اللوز وانا عندى ٥ سنين تقريبا..و الدكتور اللى عملها لى كان استاذ أنف واذن كبير في السن ووقور وشايفه شكله قدامى لحد دلوقتي...

 و اتذكر أنه عشان يكشف عليا بسهولة اتفق معايا أنه حيكشف عليا و بعدين أكشف عليه ...ولبسنى مرايه أنف واذن الكبيرة دى وفتح بؤه و خلانى أقوله قول آه ....ويوم العملية ماما بتقول انى دخلت العمليات ماسكه فى ايد الدكتور..و باقولهم باى احنا .داخلين نعمل العملية وجايين..

و انا من يومها و انا تقمصت الموضوع..و طلعت منها شايفه الحياة طب وأشياء أخرى...و طلبت لعبه ادوات الدكتور...و بقيت أكتب على كتبى وورقى ومفرش مكتبى وأباجورتى "دكتوره نهى فؤاد رشاد" ...

 

و يوم التنسيق لزقت كل ستيكرات طب الجمهورية وانا فى قمة السعادة...وبابا اقترح عليا ادخل كليه تانيه..وقالى افرضى مجالكيش طب..قعدتله على الأرض وعيطت فى لحظة درامية و قلت له جملتى الشهيرة "لو مجاليش طب مش داخله كليات خالص..حأقعد لكم فى البيت"..

 

عشان كدا وبعد كل السنين دى..بأحبه و مهما عمل فيا على قلبى زى العسل...وعلاقتى بيه عامله زي الستات بعد ٢٥ سنة جواز..تشتكى من حناكه جوزها لطوب الأرض...و ساعة العصارى تعمل الشاى وتقطع البطيخ وتقعد تضحك مع حناكه ومتستغناش عنه أبدا..