إحنا جامدين أوي

كان في احتمال أن البنت تكون متجوزة فعلا جواز عرفى غير مسجل (وبتحصل بشكل منتظم وشكل كبير جدا ويسجلوا لما البنت تكمل السن القانوني) ..

أو تكون البنت ضحية انتهاك و أهلها بيحاولوا يستوعبوا الموقف ..

لكن احنا اخترنا السيناريو اللى على هوانا عشان احنا أخلاقيا جامدين اوى...و اكيد امها السبب عشان الستات أصل الشرور (راجع أسطورة صندوق بندورا) ...و عملنا فيديو عشان احنا كارهات لذواتنا اصلا وشاربين احتقار الستات بالمعلقة ونسينا أن احنا كمان ستات..

ولازم نشتم التربية الإيجابية (رغم أن الوسط اللى هى بتتكلم عنه مبعرفش تربيه إيجابية من سلبية و الفلكه و الكرباج سيد الموقف) ..و نقول كلمتين برده على شغل الستات (رغم أن الوسط اللى بتتكلم عنه برده مفيهوش ستات بتشتغل الا مهن بسيطة و معظمها سيدات معيلة اجوازهم رمولهم العيال) ..و لازم نتكلم عن الحدود الشرعية (رغم أن مفيش مؤمن طعان ولا لعان ولا بذىء ....بس احنا إيماننا مختلف) ...وبالمرة نشتم السبكي.. فرصة...

و دا يثبت لنا أن ورا الجاموسة مش مكان...ورا الجاموسة حالة فى الوجدان...